tafsil batane se kinara hi kiya hai

tafsīl batāne se kināra hī kiyā hai

kyā chāhtā huuñ us ko ishāra hī kiyā hai

mushkil thā agar koī to vo biich meñ chhoḌā

āsān milā mujh ko to saarā hī kiyā hai

us kā mutabādil bhī usī tarah kā DhūñDā

ya.anī ki ḳhasāre pe ḳhasāra hī kiyā hai

jab ek dafa se na huī utnī tashaffī

phir saare ke saare ko dobāra hī kiyā hai

hālāñki pahuñch se kahīñ bāhar hai ye phir bhī

koī na koī ham ne to chāra hī kiyā hai

vaisā hī javāb us ko maiñ de saktā thā lekin

vo kahtā rahā jo bhī gavārā hī kiyā hai

darpesh qaziyye the hameñ aur bhī lekin

sab chhoḌ ke bas kaam tumhārā hī kiyā hai

bilkul hī na hone se to kuchh honā hai behtar

jaisā bhī milā ham ne guzāra hī kiyā hai

tafsil batane se kinara hi kiya hai

kya chahta hun us ko ishaara hi kiya hai

mushkil tha agar koi to wo bich mein chhoDa

aasan mila mujh ko to sara hi kiya hai

us ka mutabaadil bhi usi tarah ka DhunDa

yani ki KHasare pe KHasara hi kiya hai

jab ek dafa se na hui utni tashaffi

phir sare ke sare ko dobara hi kiya hai

haalanki pahunch se kahin bahar hai ye phir bhi

koi na koi hum ne to chaara hi kiya hai

waisa hi jawab us ko main de sakta tha lekin

wo kahta raha jo bhi gawara hi kiya hai

darpesh qaziyye the hamein aur bhi lekin

sab chhoD ke bas kaam tumhaara hi kiya hai

bilkul hi na hone se to kuchh hona hai behtar

jaisa bhi mila hum ne guzara hi kiya hai