tajdid-e-rasm-o-rah-e-mulaqat kijiye

tajdīd-e-rasm-o-rāh-e-mulāqāt kījiye

mujh se nazar milā ke zarā baat kījiye

dair o haram meñ ruuh kī taskīñ na ho sakī

ab ehtirām-e-pīr-e-ḳharābāt kījiye

āḳhir janāb-e-shaiḳh haiñ mehmān-e-mai-kada

do-chār jaam de ke mudārāt kījiye

guftār-e-talḳh sheva-e-vā.iz hai mai-kasho

shīrīñ dahan kī aap se kyā baat kījiye

aayā hai koī pursish-e-ahvāl ke liye

pesh āñsuoñ kī aap bhī sauġhāt kījiye

'anvar' ḳhayāl-e-dost meñ likh kar koī ġhazal

takmīl-e-tarjumāni-e-jazbāt kījiye

tajdid-e-rasm-o-rah-e-mulaqat kijiye

mujh se nazar mila ke zara baat kijiye

dair o haram mein ruh ki taskin na ho saki

ab ehtiram-e-pir-e-KHarabaat kijiye

aaKHir janab-e-shaiKH hain mehman-e-mai-kada

do-chaar jam de ke mudaraat kijiye

guftar-e-talKH shewa-e-waiz hai mai-kasho

shirin dahan ki aap se kya baat kijiye

aaya hai koi pursish-e-ahwal ke liye

pesh aansuon ki aap bhi saughat kijiye

'anwar' KHayal-e-dost mein likh kar koi ghazal

takmil-e-tarjumani-e-jazbaat kijiye