tajraba jo bhi hai mera main wahi likhta hun

tajraba jo bhī hai merā maiñ vahī likhtā huuñ

maiñ tasavvur ke bharose pe nahīñ baiThā huuñ

jab maiñ bāhar se baḌā saḳht nazar ā.ūñgā

tum samajhnā ki maiñ andar se bahut TuuTā huuñ

jis kī ḳhushbū mujhe mismār kiyā kartī hai

maiñ usī qabr pe phūloñ kī tarah khiltā huuñ

bārhā jism ne phir zehn ne bechā hai mujhe

kyā maiñ qudrat kī dukānoñ meñ rakhā saudā huuñ

merā TuuTā huā chashma hī bharosa hai mirā

apnī āñkhoñ se apāhij maiñ koī bachcha huuñ

Dūbtā dekh rahā huuñ maiñ ḳhudī meñ ḳhud ko

dil kī ik bench pe baiThā huā maiñ hañstā huuñ

tajraba jo bhi hai mera main wahi likhta hun

main tasawwur ke bharose pe nahin baiTha hun

jab main bahar se baDa saKHt nazar aaunga

tum samajhna ki main andar se bahut TuTa hun

jis ki KHushbu mujhe mismar kiya karti hai

main usi qabr pe phulon ki tarah khilta hun

barha jism ne phir zehn ne becha hai mujhe

kya main qudrat ki dukanon mein rakha sauda hun

mera TuTa hua chashma hi bharosa hai mera

apni aankhon se apahij main koi bachcha hun

Dubta dekh raha hun main KHudi mein KHud ko

dil ki ek bench pe baiTha hua main hansta hun