taKHayyul mein kabhi jab aap ki taswir ubhri hai

taḳhayyul meñ kabhī jab aap kī tasvīr ubhrī hai

to kāġhaz par qalam kī nok se tahrīr hai

mirī qismat kī kashtī bahr-e-ġham meñ Duub saktī thī

tirī taqdīr se shāyad mirī taqdīr ubhrī hai

tirī yādoñ kā sūraj mustaqil gardish meñ ho jaise

kahīñ par din nikal aayā kahīñ tanvīr ubhrī hai

hinā ke phuul hāthoñ par sajā ke ye kahā us ne

hathelī par tumhāre pyaar kī zanjīr ubhrī hai

abhī tak niiñd ke panchhī jo palkoñ par nahīñ utre

mirī āñkhoñ meñ tere ḳhvāb kī ta.abīr ubhrī hai

chale bhī aao 'anvar' zindagī kī āḳhirī shab hai

tumhārī yaad hai aur hasrat-e-dil-gīr ubhrī hai

taKHayyul mein kabhi jab aap ki taswir ubhri hai

to kaghaz par qalam ki nok se tahrir hai

meri qismat ki kashti bahr-e-gham mein Dub sakti thi

teri taqdir se shayad meri taqdir ubhri hai

teri yaadon ka suraj mustaqil gardish mein ho jaise

kahin par din nikal aaya kahin tanwir ubhri hai

hina ke phul hathon par saja ke ye kaha us ne

hatheli par tumhaare pyar ki zanjir ubhri hai

abhi tak nind ke panchhi jo palkon par nahin utre

meri aankhon mein tere KHwab ki tabir ubhri hai

chale bhi aao 'anwar' zindagi ki aaKHiri shab hai

tumhaari yaad hai aur hasrat-e-dil-gir ubhri hai