takmil hone wala hai aiwan-e-shaeri

takmīl hone vaalā hai aivān-e-shā.erī

mujh par huā ajiib hī bārān-e-shā.erī

tere ḳhayāl-o-ḳhvāb kī duniyā sajā.ī hai

kamre meñ bas yahī to hai sāmān-e-shā.erī

shahvat-parast logoñ kā qabza hai har taraf

yuuñ ho rahā hai chaak garebān-e-shā.erī

mahbūb tere shauq meñ likkhā hai sab kalām

guzre tirī nazar se bhī dīvān-e-shā.erī

'jāmī' 'nazīrī' 'rūmī'-o-'bedil' ko paḌh ke dekh

labrez ḳhushbuoñ se hai gul-dān-e-shā.erī

saif-ul-mulūk 'rūmī'-e-kashmīr ne likhī

chambe kī buuTī likh gayā sultān-e-shā.erī

sab ko suḳhan kā rizq mayassar nahīñ 'razā'

har shaḳhs ke liye nahīñ maidān-e-shā.erī

takmil hone wala hai aiwan-e-shaeri

mujh par hua ajib hi baran-e-shaeri

tere KHayal-o-KHwab ki duniya sajai hai

kamre mein bas yahi to hai saman-e-shaeri

shahwat-parast logon ka qabza hai har taraf

yun ho raha hai chaak gareban-e-shaeri

mahbub tere shauq mein likkha hai sab kalam

guzre teri nazar se bhi diwan-e-shaeri

'jami' 'naziri' 'rumi'-o-'bedil' ko paDh ke dekh

labrez KHushbuon se hai gul-dan-e-shaeri

saif-ul-muluk 'rumi'-e-kashmir ne likhi

chambe ki buTi likh gaya sultan-e-shaeri

sab ko suKHan ka rizq mayassar nahin 'raza'

har shaKHs ke liye nahin maidan-e-shaeri