talash kar meri barbaadiyon ka hal baba

talāsh kar mirī barbādiyoñ kā hal baabā

jo tū kahegā karūñgā vahī amal baabā

tarah tarah ke ye chole na tū badal baabā

tujhe jo faisla karnā hai kar aTal baabā

faqīr ban nahīñ saktā to oḌh kar kamlī

ḳhudī ko dil se miTā nafs ko kuchal baabā

nashe meñ zar ke bahut pagḌiyāñ uchhālī haiñ

zarūr tujh ko milegā kiye kā phal baabā

tirī talāsh meñ dair-o-haram ko chhān liyā

kahāñ chhupā hai tū āvāz de nikal baabā

fareb-e-husn se vāqif nahīñ hai tū sun le

Dagar Dagar hai kaThin jā.egā phisal baabā

lagā hai kaun sā ġham tujh ko ye batā 'ahmar'

udaas kis liye rahtā hai āj-kal baabā

talash kar meri barbaadiyon ka hal baba

jo tu kahega karunga wahi amal baba

tarah tarah ke ye chole na tu badal baba

tujhe jo faisla karna hai kar aTal baba

faqir ban nahin sakta to oDh kar kamli

KHudi ko dil se miTa nafs ko kuchal baba

nashe mein zar ke bahut pagDiyan uchhaali hain

zarur tujh ko milega kiye ka phal baba

teri talash mein dair-o-haram ko chhan liya

kahan chhupa hai tu aawaz de nikal baba

fareb-e-husn se waqif nahin hai tu sun le

Dagar Dagar hai kaThin jaega phisal baba

laga hai kaun sa gham tujh ko ye bata 'ahmar'

udas kis liye rahta hai aaj-kal baba