talKHaba-e-gham KHanda-jabin ho ke piye ja

talḳhāba-e-ġham ḳhanda-jabīñ ho ke piye jā

mauhūm umīdoñ ke sahāroñ pe jiye jā

māyūs na ho be-ruḳhī-e-chashm-e-jahāñ se

shā.ista-e-ehsās koī kaam kiye jā

shikva na kar is daur-e-junūñ-zād kā koī

taqdīr-e-ḳhirad-soz ko ilzām diye jā

auroñ ko garebāñ kī tujhe fikr hī kyuuñ ho

tū apnī hī sad-chāki-e-dāmāñ ko siye jā

har lamha taġhayyur pe nigāhoñ ko jamā.e

tū jā.iza-e-gardish-e-ayyām liye jā

is jabr-e-mashiyyat ko to sahnā hī paḌegā

be-kaif sahī un ke ishāroñ pe jiye jā

saaqī kī nazar se koī nisbat hai to 'anvar'

piine kī adā ye bhī hai be-jām piye jā

talKHaba-e-gham KHanda-jabin ho ke piye ja

mauhum umidon ke sahaaron pe jiye ja

mayus na ho be-ruKHi-e-chashm-e-jahan se

shaista-e-ehsas koi kaam kiye ja

shikwa na kar is daur-e-junun-zad ka koi

taqdir-e-KHirad-soz ko ilzam diye ja

auron ko gareban ki tujhe fikr hi kyun ho

tu apni hi sad-chaaki-e-daman ko siye ja

har lamha taghayyur pe nigahon ko jamae

tu jaiza-e-gardish-e-ayyam liye ja

is jabr-e-mashiyyat ko to sahna hi paDega

be-kaif sahi un ke ishaaron pe jiye ja

saqi ki nazar se koi nisbat hai to 'anwar'

pine ki ada ye bhi hai be-jam piye ja