tamam hijr usi ka visal hai us ka

tamām hijr usī kā visāl hai us kā

maiñ jī rahā huuñ magar jaan o maal hai us kā

vo ziina ziina utarne lage to sab bujh jaa.e

vo baam par hai to sab māh-o-sāl hai us kā

maiñ qatl ho ke bhī sharminda apne-āp se huuñ

ki is ke ba.ad to saarā zavāl hai us kā

ugal rahī haiñ ḳhazāne khulī huī āñkheñ

ḳhabar karo ki ye sar pā.emāl hai us kā

hazār saal se huuñ tishna-e-savāl-o-javāb

maiñ itnā pyāsā huuñ sonā muhāl hai us kā

uThā.e haath to añgḌā.ī isti.āra bane

vo tāb-o-tab hai ki har dil ġhazāl hai us kā

qadam qadam shajar-e-sāya-dār paidā hai

ki mere saath safar meñ ḳhayāl hai us kā

vo le ke aayā hai apnī sarisht meñ shabnam

safar bhī jānib-e-bād-e-shimāl hai us kā

nigāh uTThe to shā.ista-e-junūñ ho jaa.eñ

havas ko said kare vo jamāl hai us kā

ḳhabar nahīñ thī ki yuuñ us meñ Duub jā.eñge

hamāre chehre pe rañg-e-malāl hai us kā

kabhī kabhī to baḌe zor se dhaḌaktā hai

ye merā dil nahīñ koī kamāl hai us kā

jo aayā hijr kā mausam to kyā kareñge ham

jo tajrabe meñ nahīñ vo savāl hai us kā

tamam hijr usi ka visal hai us ka

main ji raha hun magar jaan o mal hai us ka

wo zina zina utarne lage to sab bujh jae

wo baam par hai to sab mah-o-sal hai us ka

main qatl ho ke bhi sharminda apne-ap se hun

ki is ke baad to sara zawal hai us ka

ugal rahi hain KHazane khuli hui aankhen

KHabar karo ki ye sar paemal hai us ka

hazar sal se hun tishna-e-sawal-o-jawab

main itna pyasa hun sona muhaal hai us ka

uThae hath to angDai istiara bane

wo tab-o-tab hai ki har dil ghazal hai us ka

qadam qadam shajar-e-saya-dar paida hai

ki mere sath safar mein KHayal hai us ka

wo le ke aaya hai apni sarisht mein shabnam

safar bhi jaanib-e-baad-e-shimal hai us ka

nigah uTThe to shaista-e-junun ho jaen

hawas ko said kare wo jamal hai us ka

KHabar nahin thi ki yun us mein Dub jaenge

hamare chehre pe rang-e-malal hai us ka

kabhi kabhi to baDe zor se dhaDakta hai

ye mera dil nahin koi kamal hai us ka

jo aaya hijr ka mausam to kya karenge hum

jo tajrabe mein nahin wo sawal hai us ka