tamam ru-e-zamin par sukut chhaya tha

tamām rū-e-zamīñ par sukūt chhāyā thā

nuzūl kaisī qayāmat kā hone vaalā thā

yahāñ to aag ugaltī hai ye zamīñ har sū

vo ek abr kā paara kahāñ pe barsā thā

bas ek baar huā thā vajūd kā ehsās

bas ek baar darīche se us ne jhāñkā thā

abhī Dasā na gayā thā ye jism taptā huā

abhī ḳhazīna-e-maḳhfī pe saañp soyā thā

safar meñ sar pe tirī dhun to thī savār magar

nigāh meñ koī manzil na koī rasta thā

ye qatra bahr-e-ma.ānī hai maujzan jis meñ

qalam kī nok se pahle kabhī na Tapkā thā

tamam ru-e-zamin par sukut chhaya tha

nuzul kaisi qayamat ka hone wala tha

yahan to aag ugalti hai ye zamin har su

wo ek abr ka para kahan pe barsa tha

bas ek bar hua tha wajud ka ehsas

bas ek bar dariche se us ne jhanka tha

abhi Dasa na gaya tha ye jism tapta hua

abhi KHazina-e-maKHfi pe sanp soya tha

safar mein sar pe teri dhun to thi sawar magar

nigah mein koi manzil na koi rasta tha

ye qatra bahr-e-maani hai maujzan jis mein

qalam ki nok se pahle kabhi na Tapka tha