tamam shahr hi dushman hai kya kiya jae

tamām shahr hī dushman hai kyā kiyā jaa.e

vafā ke naam se bad-zan hai kyā kiyā jaa.e

mujhī se pūchh rahā hai ye merā ham-sāya

tumhārā ghar mirā āñgan hai kyā kiyā jaa.e

girā diyā thā mire ghar ko pichhlī bārish ne

ki phir se ghaat meñ sāvan hai kyā kiyā jaa.e

paḌhā.ī jaatī hai maktab meñ ab ġhalat tārīḳh

fasādī haath meñ bachpan hai kyā kiyā jaa.e

jo bachche ho ga.e qābil uḌe vo panchhī se

ki suunā suunā sā āñgan hai kyā kiyā jaa.e

ki sach kuchal diyā beva kī hasratoñ kī tarah

ki jhuuT haath meñ kañgan hai kyā kiyā jaa.e

havelī dil kī hai 'armān' suunī suunī sī

udaas ruuh kā āñgan hai kyā kiyā jaa.e

tamam shahr hi dushman hai kya kiya jae

wafa ke nam se bad-zan hai kya kiya jae

mujhi se puchh raha hai ye mera ham-saya

tumhaara ghar mera aangan hai kya kiya jae

gira diya tha mere ghar ko pichhli barish ne

ki phir se ghat mein sawan hai kya kiya jae

paDhai jati hai maktab mein ab ghalat tariKH

fasadi hath mein bachpan hai kya kiya jae

jo bachche ho gae qabil uDe wo panchhi se

ki suna suna sa aangan hai kya kiya jae

ki sach kuchal diya bewa ki hasraton ki tarah

ki jhuT hath mein kangan hai kya kiya jae

haweli dil ki hai 'arman' suni suni si

udas ruh ka aangan hai kya kiya jae