tamam umr bachata raha KHuda usko

tamām umr bachātā rahā ḳhudā us ko

kisī kī lag hī ga.ī phir bhī badduā us ko

vo apnī zindagī aur dostoñ meñ hai masrūf

merī tamām pareshāniyoñ se kyā us ko

tum us se kahnā kisī din tabāh kar degā

kam umr laḌkiyoñ ke dil se khelnā us ko

bichhaḌte vaqt use dekh kar lagā jaise

har ek chiiz kā pahle se ilm thā us ko

hunar-shanās kisī din qarār kar deñge

banāne vaale tire fan kī intihā us ko

na jaane kaun sā pesha hai jis meñ lagtā hai

har ek shaam koī aadmī nayā us ko

use satā.eñ mohabbat ke lauTte mausam

kabhī bhī raas na aa.e america us ko

ḳhudā maiñ bhī tirī is duniyā ko miTā dūñgā

hamāre jhagḌe meñ kuchh bhī agar huā us ko

tamam umr bachata raha KHuda us ko

kisi ki lag hi gai phir bhi baddua us ko

wo apni zindagi aur doston mein hai masruf

meri tamam pareshaniyon se kya us ko

tum us se kahna kisi din tabah kar dega

kam umr laDkiyon ke dil se khelna us ko

bichhaDte waqt use dekh kar laga jaise

har ek chiz ka pahle se ilm tha us ko

hunar-shanas kisi din qarar kar denge

banane wale tere fan ki intiha us ko

na jaane kaun sa pesha hai jis mein lagta hai

har ek sham koi aadmi naya us ko

use sataen mohabbat ke lauTte mausam

kabhi bhi ras na aae america us ko

KHuda main bhi teri is duniya ko miTa dunga

hamare jhagDe mein kuchh bhi agar hua us ko