tamasha-e-alam hai aur main hun

tamāshā-e-alam hai aur maiñ huuñ

ḳhushī ke saath ġham hai aur maiñ huuñ

zamāne kā sitam hai aur maiñ huuñ

ye sab un kā karam hai aur maiñ huuñ

rah-e-haq par qadam hai aur maiñ huuñ

sar-e-aflāk ḳham hai aur maiñ huuñ

tamavvuj par abhī hai bahr-e-hastī

safīna zer-o-bam hai aur maiñ huuñ

abhī kaise kahūñ sub.h-e-bahārāñ

abhī to shām-e-ġham hai aur maiñ huuñ

kahīñ bazm-e-nashāt-e-aish-o-ishrat

kahīñ par chashm-e-nam hai aur maiñ huuñ

badal Dālūñ nizām-e-zindagī ye

baḌī mushkil meñ dam hai aur maiñ huuñ

kisī lamha bhaḌak kar bujh na jaa.e

charāġh-e-sub.h-dam hai aur maiñ huuñ

mujhe tanhā na samjho mere 'hamdam'

hujūm-e-ranj-o-ġham hai aur maiñ huuñ

tamasha-e-alam hai aur main hun

KHushi ke sath gham hai aur main hun

zamane ka sitam hai aur main hun

ye sab un ka karam hai aur main hun

rah-e-haq par qadam hai aur main hun

sar-e-aflak KHam hai aur main hun

tamawwuj par abhi hai bahr-e-hasti

safina zer-o-bam hai aur main hun

abhi kaise kahun subh-e-bahaaran

abhi to sham-e-gham hai aur main hun

kahin bazm-e-nashat-e-aish-o-ishrat

kahin par chashm-e-nam hai aur main hun

badal Dalun nizam-e-zindagi ye

baDi mushkil mein dam hai aur main hun

kisi lamha bhaDak kar bujh na jae

charagh-e-subh-dam hai aur main hun

mujhe tanha na samjho mere 'hamdam'

hujum-e-ranj-o-gham hai aur main hun