tang aate bhi nahin kashmakash-e-dahr se log

tañg aate bhī nahīñ kashmakash-e-dahr se log

kyā tamāshā hai ki marte bhī nahīñ zahr se log

shahr meñ aa.e the sahrā kī fazā se thak kar

ab kahāñ jā.eñge āseb-zada shahr se log

naḳhl-e-hastī nazar aa.egā kabhī naḳhl-e-salīb

ziist kī faal nikāleñge kabhī zahr se log

ham ko jannat kī fazā se bhī ziyāda hai aziiz

yahī be-rañg sī duniyā yahī be-mehr se log

mutma.in rahte haiñ tūfān-e-masā.ib meñ kabhī

Duub jaate haiñ kabhī dard kī ik lahr se log

ai zamīñ aaj bhī zarre haiñ tire mahr-tarāsh

ai falak aaj bhī laḌte haiñ tire qahr se log

sirf mahrūmī-e-farhād kā kyā zikr 'sahar'

be-sutūñ kaaT ke mahrūm rahe nahr se log

tang aate bhi nahin kashmakash-e-dahr se log

kya tamasha hai ki marte bhi nahin zahr se log

shahr mein aae the sahra ki faza se thak kar

ab kahan jaenge aaseb-zada shahr se log

naKHl-e-hasti nazar aaega kabhi naKHl-e-salib

zist ki fal nikalenge kabhi zahr se log

hum ko jannat ki faza se bhi ziyaada hai aziz

yahi be-rang si duniya yahi be-mehr se log

mutmain rahte hain tufan-e-masaib mein kabhi

Dub jate hain kabhi dard ki ek lahr se log

ai zamin aaj bhi zarre hain tere mahr-tarash

ai falak aaj bhi laDte hain tere qahr se log

sirf mahrumi-e-farhad ka kya zikr 'sahar'

be-sutun kaT ke mahrum rahe nahr se log