tanha kar ke mujhko salib-e-sawal pe chhoD diya

tanhā kar ke mujh ko salīb-e-savāl pe chhoḌ diyā

maiñ ne bhī duniyā ko us ke haal pe chhoḌ diyā

ik chingārī ik jugnū ik aañsū aur ik phuul

jaate hue kyā kyā us ne rūmāl pe chhoḌ diyā

paara paara ḳhushbū chakrātī hai kamre meñ

aag jalā ke shīra us ne ubaal pe chhoḌ diyā

pahle us ne barsā.e ākāsh pe saare tiir

phir dhīre se ghoḌe ko pātāl pe chhoḌ diyā

uThne vaalā hai bāzār kahūñ kyā yūsuf se

sikkoñ kā thailā maiñ ne Taksāl pe chhoḌ diyā

tāzīrāt pe dil mahshar tan larza chehra faq

rab ne chashm-e-do-qatra sayyāl pe chhoḌ diyā

pashmīne sā maazī thā 'tafzīl' samor sā haal

mustaqbil ko uunī havā kī taal pe chhoḌ diyā

tanha kar ke mujh ko salib-e-sawal pe chhoD diya

main ne bhi duniya ko us ke haal pe chhoD diya

ek chingari ek jugnu ek aansu aur ek phul

jate hue kya kya us ne rumal pe chhoD diya

para para KHushbu chakraati hai kamre mein

aag jala ke shira us ne ubaal pe chhoD diya

pahle us ne barsae aakash pe sare tir

phir dhire se ghoDe ko patal pe chhoD diya

uThne wala hai bazar kahun kya yusuf se

sikkon ka thaila main ne Taksal pe chhoD diya

taziraat pe dil mahshar tan larza chehra faq

rab ne chashm-e-do-qatra sayyal pe chhoD diya

pashmine sa mazi tha 'tafzil' samor sa haal

mustaqbil ko uni hawa ki tal pe chhoD diya