tanha na dil hi lashkar-e-gham dekh Tal gaya

tanhā na dil hī lashkar-e-ġham dekh Tal gayā

is mā'rke meñ pā-e-tahammul bhī chal gayā

haiñ garm-e-guftugū gul o bulbul chaman ke biich

hogā ḳhalal sabā jo koī paat mil gayā

us sham'-rū se qasd na milne kā thā hameñ

par dekhte hī mom-sifat dil pighal gayā

mun'im tū yaañ ḳhayāl-e-imārat meñ kho na 'umr

le kaun apne saath ye qasr-o-mahal gayā

laagī na ġhair-e-yās hinā-e-umīd haath

duniyā se jo gayā kaf-e-afsos mal gayā

us rāh-rau ne dam meñ kiyā tai rah-e-adam

hastī ke sang se jo sharar sā uchhal gayā

dekhā har ek zarre meñ us āftāb ko

jis chashm se ki be-basarī kā ḳhalal gayā

guzrī shab-e-shabāb huā roz-e-sheb aḳhīr

kuchh bhī ḳhabar hai qāfila aage nikal gayā

qābil maqām ke nahīñ 'bedār' ye sarā.e

manzil hai duur ḳhvāb se uTh din to Dhal gayā

tanha na dil hi lashkar-e-gham dekh Tal gaya

is ma'rke mein pa-e-tahammul bhi chal gaya

hain garm-e-guftugu gul o bulbul chaman ke bich

hoga KHalal saba jo koi pat mil gaya

us sham'-ru se qasd na milne ka tha hamein

par dekhte hi mom-sifat dil pighal gaya

mun'im tu yan KHayal-e-imarat mein kho na 'umr

le kaun apne sath ye qasr-o-mahal gaya

lagi na ghair-e-yas hina-e-umid hath

duniya se jo gaya kaf-e-afsos mal gaya

us rah-rau ne dam mein kiya tai rah-e-adam

hasti ke sang se jo sharar sa uchhal gaya

dekha har ek zarre mein us aaftab ko

jis chashm se ki be-basari ka KHalal gaya

guzri shab-e-shabab hua roz-e-sheb aKHir

kuchh bhi KHabar hai qafila aage nikal gaya

qabil maqam ke nahin 'bedar' ye sarae

manzil hai dur KHwab se uTh din to Dhal gaya