tanha se rah gae hain shab-e-intizar mein

tanhā se rah ga.e haiñ shab-e-intizār meñ

armāñ machal rahe haiñ dil-e-be-qarār meñ

va.ade pe aap aa na sake is kā ġham nahīñ

lekin shigāf kyoñ paḌā qaul-o-qarār meñ

maddham huī charāġh-e-tamannā kī raushnī

shāyad vo ab na aa.egā suune dayār meñ

barbādiyoñ kā apnī hameñ koī ġham nahīñ

rusvā.iyāñ to aap ne bhī pā.īñ pyaar meñ

ye ishq-e-ḳhāksār vo husn-e-anā-pasand

bigḌe kahīñ na baat isī ḳhalfishār meñ

kaise sunā.eñ haal kisī dard-mañd ko

lab band ho ga.e haiñ vafā ke hisār meñ

'ayyūb' bevafā se umīd-e-vafā nahīñ

dāman bachā.e kāñToñ se rakkhe bahār meñ

tanha se rah gae hain shab-e-intizar mein

arman machal rahe hain dil-e-be-qarar mein

wade pe aap aa na sake is ka gham nahin

lekin shigaf kyon paDa qaul-o-qarar mein

maddham hui charagh-e-tamanna ki raushni

shayad wo ab na aaega sune dayar mein

barbaadiyon ka apni hamein koi gham nahin

ruswaiyan to aap ne bhi pain pyar mein

ye ishq-e-KHaksar wo husn-e-ana-pasand

bigDe kahin na baat isi KHalfishaar mein

kaise sunaen haal kisi dard-mand ko

lab band ho gae hain wafa ke hisar mein

'ayyub' bewafa se umid-e-wafa nahin

daman bachae kanTon se rakkhe bahaar mein