tanhai ka dukh gahra tha

tanhā.ī kā dukh gahrā thā

maiñ dariyā dariyā rotā thā

ek hī lahar na sambhalī varna

maiñ tūfānoñ se khelā thā

tanhā.ī kā tanhā saayā

der se mere saath lagā thā

chhoḌ ga.e jab saare sāthī

tanhā.ī ne saath diyā thā

suukh ga.ī jab sukh kī Daalī

tanhā.ī kā phuul khilā thā

tanhā.ī meñ yād-e-ḳhudā thī

tanhā.ī meñ ḳhauf-e-ḳhudā thā

tanhā.ī mehrāb-e-ibādat

tanhā.ī mimbar kā diyā thā

tanhā.ī mirā pā-e-shikasta

tanhā.ī mirā dast-e-duā thā

vo jannat mire dil meñ chhupī thī

maiñ jise bāhar DhūñD rahā thā

tanhā.ī mire dil kī jannat

maiñ tanhā huuñ maiñ tanhā thā

tanhai ka dukh gahra tha

main dariya dariya rota tha

ek hi lahar na sambhali warna

main tufanon se khela tha

tanhai ka tanha saya

der se mere sath laga tha

chhoD gae jab sare sathi

tanhai ne sath diya tha

sukh gai jab sukh ki Dali

tanhai ka phul khila tha

tanhai mein yaad-e-KHuda thi

tanhai mein KHauf-e-KHuda tha

tanhai mehrab-e-ibaadat

tanhai mimbar ka diya tha

tanhai mera pa-e-shikasta

tanhai mera dast-e-dua tha

wo jannat mere dil mein chhupi thi

main jise bahar DhunD raha tha

tanhai mere dil ki jannat

main tanha hun main tanha tha