tanhaiyon ki barf thi bistar pe ja-ba-ja

tanhā.iyoñ kī barf thī bistar pe jā-ba-jā

sho.aloñ kā raqs raat badan par na ho sakā

parchhā.iyoñ ke āriz-o-lab kaun chūmtā

lazzat-farosh jism se maiñ duur hī rahā

maiñ ne hī apne dil ke varaq par use likhā

jo hādisa kisī se raqam ho nahīñ sakā

har-samt khiñch ga.e tirī yādoñ ke sā.ebān

kal raat dard lauT gayā chīḳhtā huā

yādoñ ne iztirāb kī rekhā.eñ khīñch diiñ

varna mire sukūn kā kāġhaz safed thā

chehroñ se uḌ chuke haiñ shanāsā.iyoñ ke aks

ab dostoñ kī khoj meñ tū umr mat gañvā

dil meñ sitam kā zahr laboñ par mai-e-ḳhulūs

yārān-e-ḳhush-kalām kā ab tajraba huā

shāyad use yaqīn kī uñglī na chhū sake

ik shaḳhs apne-āp se barsoñ nahīñ milā

haa.il thī rāste meñ rivāyāt kī ḳhalīj

vo dil kī baat apnī zabāñ tak na lā sakā

maiñ chup rahā to qaid kī mī.ād baḌh ga.ī

chīḳhā to aur halqa-e-zanjīr kas gayā

paanī ke intizār meñ phir ret phāñkiye

'aḳhtar' ye din bhī dhuup kī daldal meñ dhañs gayā

tanhaiyon ki barf thi bistar pe ja-ba-ja

shoalon ka raqs raat badan par na ho saka

parchhaiyon ke aariz-o-lab kaun chumta

lazzat-farosh jism se main dur hi raha

main ne hi apne dil ke waraq par use likha

jo hadisa kisi se raqam ho nahin saka

har-samt khinch gae teri yaadon ke saeban

kal raat dard lauT gaya chiKHta hua

yaadon ne iztirab ki rekhaen khinch din

warna mere sukun ka kaghaz safed tha

chehron se uD chuke hain shanasaiyon ke aks

ab doston ki khoj mein tu umr mat ganwa

dil mein sitam ka zahr labon par mai-e-KHulus

yaran-e-KHush-kalam ka ab tajraba hua

shayad use yaqin ki ungli na chhu sake

ek shaKHs apne-ap se barson nahin mila

hail thi raste mein riwayat ki KHalij

wo dil ki baat apni zaban tak na la saka

main chup raha to qaid ki miad baDh gai

chiKHa to aur halqa-e-zanjir kas gaya

pani ke intizar mein phir ret phankiye

'aKHtar' ye din bhi dhup ki daldal mein dhans gaya