tanhaiyon mein jab wo lab-e-baam aae hain

tanhā.iyoñ meñ jab vo lab-e-bām aa.e haiñ

sharmindagī se shams-o-qamar jhilmilā.e haiñ

lākhoñ fareb rāh-e-mohabbat meñ khaa.e haiñ

phir bhī har ek gaam pe ham muskurā.e haiñ

hālāt-e-ġham se kar diyā duniyā ko bā-ḳhabar

nok-e-mizha pe jab bhī mire ashk aa.e haiñ

jin ko ḳhizāñ bhī dekh ke hairān rah ga.ī

fasl-e-bahār tū ne 'ajab gul khilā.e haiñ

āġhosh meñ qazā ne unheñ baḌh ke le liyā

sahn-e-chaman meñ phuul agar muskurā.e haiñ

aksar kaTī haiñ hijr kī rāteñ kuchh is tarah

vo yaad aa.e haiñ to bahut yaad aa.e haiñ

mumkin nahīñ ki aap tasavvur bhī kar sakeñ

rāh-e-vafā meñ ham ne jo sadme uThā.e haiñ

'azm-e-javāñ ne hausla-e-zabt-e-ġham diyā

bādal ġhamoñ ke jab bhī mire dil pe chhā.e haiñ

hairat se mujh ko ahl-e-jahāñ dekhte haiñ aaj

maiñ ne vo naqsh rāh-e-vafā meñ banā.e haiñ

'salmān' intizār kī lazzat na un se pūchh

jo shaam hī se sham'-e-tamannā jalā.e haiñ

tanhaiyon mein jab wo lab-e-baam aae hain

sharmindagi se shams-o-qamar jhilmilae hain

lakhon fareb rah-e-mohabbat mein khae hain

phir bhi har ek gam pe hum muskurae hain

haalat-e-gham se kar diya duniya ko ba-KHabar

nok-e-mizha pe jab bhi mere ashk aae hain

jin ko KHizan bhi dekh ke hairan rah gai

fasl-e-bahaar tu ne 'ajab gul khilae hain

aaghosh mein qaza ne unhen baDh ke le liya

sahn-e-chaman mein phul agar muskurae hain

aksar kaTi hain hijr ki raaten kuchh is tarah

wo yaad aae hain to bahut yaad aae hain

mumkin nahin ki aap tasawwur bhi kar saken

rah-e-wafa mein hum ne jo sadme uThae hain

'azm-e-jawan ne hausla-e-zabt-e-gham diya

baadal ghamon ke jab bhi mere dil pe chhae hain

hairat se mujh ko ahl-e-jahan dekhte hain aaj

main ne wo naqsh rah-e-wafa mein banae hain

'salman' intizar ki lazzat na un se puchh

jo sham hi se sham'-e-tamanna jalae hain