کھڑکیوں پر رینگتی ہے چاندنی

کھڑکیوں پر رینگتی ہے چاندنی

کس کا رستہ دیکھتی ہے چاندنی

قتل کر کے دن کا یہ اب آئی ہے

جھٹپٹے کی جانکنی ہے چاندنی

وہ جو بستر پر پڑی ہے جاں بجھی

اس کا چہرہ سینکتی ہے چاندنی

ایک بے سدھ جسم کی دلجوئی میں

سلوٹوں میں گھل رہی ہے چاندنی

رات بھر کمرے میں میرے گھوم کر

تھک کے بس الٹی پڑی ہے چاندنی

اس کا میرے پاس آنا کھیل ہے

رات سے ڈرتی نہیں ہے چاندنی

بات کرتی مجھ سے یہ پردوں سے بس

صبح تک لپٹی رہی ہے چاندنی