tapish-e-dil na rahi sozish-e-jaan baqi hai

tapish-e-dil na rahī sozish-e-jāñ baaqī hai

sho.ala-e-ishq kahāñ sirf dhuāñ baaqī hai

be-hisī meñ bhī ye ehsās rahā hai aksar

ek nashtar sā qarīb rag-e-jāñ baaqī hai

mai-kasho gardish-e-daurāñ se hirāsāñ kyuuñ ho

sar-e-mai-ḳhāna abhī abr-e-ravāñ baaqī hai

zikr aatā hai jafāoñ kā tire naam ke saath

dil-e-barbād kā itnā to nishāñ baaqī hai

muddateñ ho ga.iiñ paimān-e-vafā ko TuuTe

is jafā jū se magar rabt-e-nihāñ baaqī hai

zindagī silsila-e-ishrat-e-mauhūm sahī

ġham-e-salāmat hai to āsā.ish-e-jāñ baaqī hai

manzil-e-tark-e-tamannā hai janāb-e-'ārif'

dil meñ ab bhī havas-e-lāla-ruḳhāñ baaqī hai

tapish-e-dil na rahi sozish-e-jaan baqi hai

shoala-e-ishq kahan sirf dhuan baqi hai

be-hisi mein bhi ye ehsas raha hai aksar

ek nashtar sa qarib rag-e-jaan baqi hai

mai-kasho gardish-e-dauran se hirasan kyun ho

sar-e-mai-KHana abhi abr-e-rawan baqi hai

zikr aata hai jafaon ka tere nam ke sath

dil-e-barbaad ka itna to nishan baqi hai

muddaten ho gain paiman-e-wafa ko TuTe

is jafa ju se magar rabt-e-nihan baqi hai

zindagi silsila-e-ishrat-e-mauhum sahi

gham-e-salamat hai to aasaish-e-jaan baqi hai

manzil-e-tark-e-tamanna hai janab-e-'arif'

dil mein ab bhi hawas-e-lala-ruKHan baqi hai