tapte sahraon pe garja sar-e-dariya barsa

tapte sahrāoñ pe garjā sar-e-dariyā barsā

thī talab kis ko magar abr kahāñ jā barsā

kitne tūfānoñ kī hāmil thī lahū kī ik buuñd

dil meñ ik lahr uThī aañkh se dariyā barsā

koī ġharqāb koī māhī-e-be-āb huā

abr-e-be-faiz jo barsā bhī to kaisā barsā

chaḌhte dariyāoñ meñ tūfān uThāne vaale

chand būñdeñ hī sar-e-dāman-e-sahrā barsā

tanz haiñ soḳhta-jānoñ pe garajte bādal

yā to ghanghor ghaTā.eñ na uThā yā barsā

abr-o-bārāñ ke ḳhudā jhūmtā bādal na sahī

aag hī ab sar-e-gulzār-e-tamanna barsā

apnī qismat ki ghaTāoñ meñ bhī jalte haiñ 'farāz'

aur jahāñ vo haiñ vahāñ abr kā saaya barsā

tapte sahraon pe garja sar-e-dariya barsa

thi talab kis ko magar abr kahan ja barsa

kitne tufanon ki hamil thi lahu ki ek bund

dil mein ek lahr uThi aankh se dariya barsa

koi gharqab koi mahi-e-be-ab hua

abr-e-be-faiz jo barsa bhi to kaisa barsa

chaDhte dariyaon mein tufan uThane wale

chand bunden hi sar-e-daman-e-sahra barsa

tanz hain soKHta-jaanon pe garajte baadal

ya to ghanghor ghaTaen na uTha ya barsa

abr-o-baran ke KHuda jhumta baadal na sahi

aag hi ab sar-e-gulzar-e-tamanna barsa

apni qismat ki ghaTaon mein bhi jalte hain 'faraaz'

aur jahan wo hain wahan abr ka saya barsa