tarab-afrin hai kitna sar-e-sham ye nazara

tarab-āfrīñ hai kitnā sar-e-shām ye nazārā

tire hoñT par shafaq hai mirī aañkh meñ sitārā

kiyā maiñ ne jab kisī ke ruḳh-o-zulf se kinārā

kabhī sub.h ne sadā dī kabhī shaam ne pukārā

gul-o-ġhuncha asl meñ haiñ tirī guftugū kī shakleñ

kabhī khul ke baat kah dī kabhī kar diyā ishārā

tirā naam le ke jaage tujhe yaad kar ke so.e

yuuñ hī saarī umr kaaTī yuuñ hī kar liyā guzārā

tujhe bāġhbāñ hai ḳhatra usī barq kī chamak se

kabhī tū ne ye na sochā ki hai gul bhī ik sharārā

ye adam vajūd kyā hai tirā naaz hai musavvir

kisī naqsh ko miTāyā kisī naqsh ko ubhārā

bhalā ham 'salām' āḳhir na asiir hoñge kab tak

ki jahāñ hai daam un kā vahīñ āshiyāñ hamārā

tarab-afrin hai kitna sar-e-sham ye nazara

tere honT par shafaq hai meri aankh mein sitara

kiya main ne jab kisi ke ruKH-o-zulf se kinara

kabhi subh ne sada di kabhi sham ne pukara

gul-o-ghuncha asl mein hain teri guftugu ki shaklen

kabhi khul ke baat kah di kabhi kar diya ishaara

tera nam le ke jage tujhe yaad kar ke soe

yun hi sari umr kaTi yun hi kar liya guzara

tujhe baghban hai KHatra usi barq ki chamak se

kabhi tu ne ye na socha ki hai gul bhi ek sharara

ye adam wajud kya hai tera naz hai musawwir

kisi naqsh ko miTaya kisi naqsh ko ubhaara

bhala hum 'salam' aaKHir na asir honge kab tak

ki jahan hai dam un ka wahin aashiyan hamara