tarah tarah ke fasane sunane lagti hai

tarah tarah ke fasāne sunāne lagtī hai

uḌuuñ to merī zamīñ chhaTpaTāne lagtī hai

ġhurūr-e-nasl hai yak-laḳht to na jā.egā

ki lagte lagte ye daulat Thikāne lagtī hai

na jaane kaisī havā hai ki raat hote hī

badan meñ aa ke mire ḳhaak uḌāne lagtī hai

maiñ apnī pyaas pe jab sabr bāñdh detā huuñ

to jo nadī bhī mile āzmāne lagtī hai

jahāñ jahāñ bhī maiñ us se gurez kartā huuñ

vahīñ vahīñ se vo āvāz aane lagtī hai

ḳhayāl tak bhī agar us kā naam aa jaa.e

vo haath chupke se merā dabāne lagtī hai

vo ek ḳhushbū hai aatī nahīñ nazar lekin

qarīb aate hī ḳhud ko batāne lagtī hai

tarah tarah ke fasane sunane lagti hai

uDun to meri zamin chhaTpaTane lagti hai

ghurur-e-nasl hai yak-laKHt to na jaega

ki lagte lagte ye daulat Thikane lagti hai

na jaane kaisi hawa hai ki raat hote hi

badan mein aa ke mere KHak uDane lagti hai

main apni pyas pe jab sabr bandh deta hun

to jo nadi bhi mile aazmane lagti hai

jahan jahan bhi main us se gurez karta hun

wahin wahin se wo aawaz aane lagti hai

KHayal tak bhi agar us ka nam aa jae

wo hath chupke se mera dabane lagti hai

wo ek KHushbu hai aati nahin nazar lekin

qarib aate hi KHud ko batane lagti hai