tariq-e-ishq mein mujhko koi kaamil nahin milta

tarīq-e-ishq meñ mujh ko koī kāmil nahīñ miltā

ga.e farhād o majnūñ ab kisī se dil nahīñ miltā

bharī hai anjuman lekin kisī se dil nahīñ miltā

hamīñ meñ aa gayā kuchh naqs yā kāmil nahīñ miltā

purānī raushnī meñ aur na.ī meñ farq itnā hai

use kashtī nahīñ miltī ise sāhil nahīñ miltā

pahuñchnā daad ko mazlūm kā mushkil hī hotā hai

kabhī qaazī nahīñ milte kabhī qātil nahīñ miltā

harīfoñ par ḳhazāne haiñ khule yaañ hijr-e-gesū hai

vahāñ pe bil hai aur yaañ saañp kā bhī bil nahīñ miltā

ye husn o ishq hī kā kaam hai shubah kareñ kis par

mizāj un kā nahīñ miltā hamārā dil nahīñ miltā

chhupā hai siina o ruḳh dil-sitāñ hāthoñ se karvaT meñ

mujhe sote meñ bhī vo husn se ġhāfil nahīñ miltā

havās-o-hosh gum haiñ bahr-e-irfān-e-ilāhī meñ

yahī dariyā hai jis meñ mauj ko sāhil nahīñ miltā

kitāb-e-dil mujhe kaafī hai 'akbar' dars-e-hikmat ko

maiñ spencer se mustaġhnī huuñ mujh se mil nahīñ miltā

tariq-e-ishq mein mujh ko koi kaamil nahin milta

gae farhad o majnun ab kisi se dil nahin milta

bhari hai anjuman lekin kisi se dil nahin milta

hamin mein aa gaya kuchh naqs ya kaamil nahin milta

purani raushni mein aur nai mein farq itna hai

use kashti nahin milti ise sahil nahin milta

pahunchna dad ko mazlum ka mushkil hi hota hai

kabhi qazi nahin milte kabhi qatil nahin milta

harifon par KHazane hain khule yan hijr-e-gesu hai

wahan pe bil hai aur yan sanp ka bhi bil nahin milta

ye husn o ishq hi ka kaam hai shubah karen kis par

mizaj un ka nahin milta hamara dil nahin milta

chhupa hai sina o ruKH dil-sitan hathon se karwaT mein

mujhe sote mein bhi wo husn se ghafil nahin milta

hawas-o-hosh gum hain bahr-e-irfan-e-ilahi mein

yahi dariya hai jis mein mauj ko sahil nahin milta

kitab-e-dil mujhe kafi hai 'akbar' dars-e-hikmat ko

main spencer se mustaghni hun mujh se mil nahin milta