tariqat mein agar zahid mujhe gumrah jaane hai

tarīqat meñ agar zāhid mujhe gumrāh jaane hai

mire dil kī haqīqat ko mirā allāh jaane hai

vo be-parvā mirā kab imtiyāz-e-chāh jaane hai

mirī hālat ko dil aur dil kī hālat aah jaane hai

use jo dekhtā hai din ko so ḳhurshīd jaane hai

jo ghar se raat ko nikle to 'ālam maah jaane hai

hamārī baat ko vo āqibat-nā-fahm kyā maane

jo bad-ḳhvāhoñ ko apne apnā daulat-ḳhvāh jaane hai

mirā dil bār-e-ishq aisā uThāne meñ dilāvar hai

jo us ke koh duuñ sar par to us ko kaah jaane hai

hameñ dair o haram shaiḳh o brahman se nahīñ matlab

hamārā dil to apne dil ko baitullāh jaane hai

vo vahshī is qadar bhaḌkā hai sūrat se mire yaaro

ki apne dekh saa.e ko mujhe hamrāh jaane hai

kaheñ ham bahr-e-be-pāyān-e-ġham kī māhiyat kis se

na lahroñ se koī vāqif na koī thaah jaane hai

ḳhudā ke vāste insāf kiijo kyā tamāsha hai

maiñ us kā ḳhair-ḳhvāh aur vo mujhe bad-ḳhvāh jaane hai

agar vo fitna jo tujh se mile 'hātim' to kah diijo

ki mansūbe tire sab banda-e-dargāh jaane hai

tariqat mein agar zahid mujhe gumrah jaane hai

mere dil ki haqiqat ko mera allah jaane hai

wo be-parwa mera kab imtiyaz-e-chah jaane hai

meri haalat ko dil aur dil ki haalat aah jaane hai

use jo dekhta hai din ko so KHurshid jaane hai

jo ghar se raat ko nikle to 'alam mah jaane hai

hamari baat ko wo aaqibat-na-fahm kya mane

jo bad-KHwahon ko apne apna daulat-KHwah jaane hai

mera dil bar-e-ishq aisa uThane mein dilawar hai

jo us ke koh dun sar par to us ko kah jaane hai

hamein dair o haram shaiKH o brahman se nahin matlab

hamara dil to apne dil ko baitullah jaane hai

wo wahshi is qadar bhaDka hai surat se mere yaro

ki apne dekh sae ko mujhe hamrah jaane hai

kahen hum bahr-e-be-payan-e-gham ki mahiyat kis se

na lahron se koi waqif na koi thah jaane hai

KHuda ke waste insaf kijo kya tamasha hai

main us ka KHair-KHwah aur wo mujhe bad-KHwah jaane hai

agar wo fitna jo tujh se mile 'hatim' to kah dijo

ki mansube tere sab banda-e-dargah jaane hai