tark-e-talluqat nahin chahta tha main

tark-e-ta.alluqāt nahīñ chāhtā thā maiñ

ġham se tire najāt nahīñ chāhtā thā maiñ

kab chāhtā thā terī ināyat kī bārisheñ

shādābī-e-hayāt nahīñ chāhtā thā meñ

mujh se tū ai bahisht-e-nazar yuuñ nazar na pher

kyā tujh ko tā-hayāt nahīñ chāhtā thā maiñ

maiñ chāhtā thā tum se na jītūñ kabhī magar

khā jā.ūñ ḳhud se maat nahīñ chāhtā thā maiñ

guzrī hai dil pe kaisī qayāmat maiñ kyā kahūñ

nafrat kī kā.enāt nahīñ chāhtā thā maiñ

kyā haal ab hai tere ta.āqub meñ ai hayāt

tū yuuñ hī aa.e haat nahīñ chāhtā thā maiñ

maiñ chāhtā thā raah meñ kuchh mushkileñ magar

har har qadam pe ghaat nahīñ chāhtā thā maiñ

'rāġhib' vo merī fikr meñ ḳhud ko bhī bhuul jaa.eñ

aisī to koī baat nahīñ chāhtā thā maiñ

tark-e-talluqat nahin chahta tha main

gham se tere najat nahin chahta tha main

kab chahta tha teri inayat ki barishen

shadabi-e-hayat nahin chahta tha mein

mujh se tu ai bahisht-e-nazar yun nazar na pher

kya tujh ko ta-hayat nahin chahta tha main

main chahta tha tum se na jitun kabhi magar

kha jaun KHud se mat nahin chahta tha main

guzri hai dil pe kaisi qayamat main kya kahun

nafrat ki kaenat nahin chahta tha main

kya haal ab hai tere taaqub mein ai hayat

tu yun hi aae hat nahin chahta tha main

main chahta tha rah mein kuchh mushkilen magar

har har qadam pe ghat nahin chahta tha main

'raghib' wo meri fikr mein KHud ko bhi bhul jaen

aisi to koi baat nahin chahta tha main