tarsa na mujhko khinch ke talwar mar Dal

tarsā na mujh ko khīñch ke talvār maar Daal

gar maar Dālnā hai to yak-bār maar Daal

āshiq jo terī zulf kā ho us ko tū sanam

le jā ke tīra-shab pas-e-dīvār maar Daal

kubk-e-darī ke laakh qafas hoñ jahāñ dhare

dikhlā ke un ko shoḳhi-e-raftār maar Daal

kuchh ham ne tere haath to pakḌe nahīñ miyāñ

gar jāntā hai ham ko gunahgār maar Daal

sayyād tujh ko kis ne kahā thā ki fasl-e-gul

mujh ko qafas meñ kar ke giraftār maar Daal

jo jāñ-ba-lab ho hasrat-e-dīdār meñ tirī

dikhlā ke us ko jalva-e-ruḳhsār maar Daal

saudā.idān-e-ishq kā jhagḌā chukā kahīñ

le jā ke un ko barsar-e-bāzār maar Daal

teġh o kamand maañg kar abrū o zulf se

āshiq bahut hue haiñ jafā-kār maar Daal

gar ye bhī ho sake na to kahtā hai 'mus.hafī'

do chaar kar le qaid meñ do-chār maar Daal

tarsa na mujh ko khinch ke talwar mar Dal

gar mar Dalna hai to yak-bar mar Dal

aashiq jo teri zulf ka ho us ko tu sanam

le ja ke tira-shab pas-e-diwar mar Dal

kubk-e-dari ke lakh qafas hon jahan dhare

dikhla ke un ko shoKHi-e-raftar mar Dal

kuchh hum ne tere hath to pakDe nahin miyan

gar jaanta hai hum ko gunahgar mar Dal

sayyaad tujh ko kis ne kaha tha ki fasl-e-gul

mujh ko qafas mein kar ke giraftar mar Dal

jo jaan-ba-lab ho hasrat-e-didar mein teri

dikhla ke us ko jalwa-e-ruKHsar mar Dal

saudaidan-e-ishq ka jhagDa chuka kahin

le ja ke un ko barsar-e-bazar mar Dal

tegh o kamand mang kar abru o zulf se

aashiq bahut hue hain jafa-kar mar Dal

gar ye bhi ho sake na to kahta hai 'mushafi'

do chaar kar le qaid mein do-chaar mar Dal