tasawwur humne jab tera kiya pesh-e-nazar paya

tasavvur ham ne jab terā kiyā pesh-e-nazar paayā

tujhe dekhā jidhar dekhā tujhe paayā jidhar paayā

kahāñ ham ne na is dard-e-nihānī kā asar paayā

yahāñ uTThā vahāñ chamkā idhar aayā udhar paayā

patā us ne diyā terā milā jo 'ishq meñ ḳhud gum

ḳhabar terī usī se paa.ī jis ko be-ḳhabar paayā

dil-e-betāb ke pahlū se jaate hī gayā sab kuchh

na pā.īñ siine meñ aa.heñ na aahoñ meñ asar paayā

vo chashm-e-muntazir thī jis ko dekhā aa ke vā tum ne

vo naala thā hamārā jis ko sote raat bhar paayā

maiñ huuñ vo nā-tavāñ pinhāñ rahā ḳhud aañkh se apnī

hamesha aap ko gum sūrat-e-tār-e-nazar paayā

habīb apnā agar dekhā to dāġh-e-'ishq ko dekhā

tabīb apnā agar paayā to ik dard-e-jigar paayā

kiyā gum ham ne dil ko justujū meñ dāġh-e-hasrat kī

kisī ko pā ke kho baiThe kisī ko DhūñDh kar paayā

bahut se ashk-e-rañgīñ ai 'jalāl' is aañkh se Tapke

magar be-rang hī dekhā na kuchh rañg-e-asar paayā

tasawwur hum ne jab tera kiya pesh-e-nazar paya

tujhe dekha jidhar dekha tujhe paya jidhar paya

kahan hum ne na is dard-e-nihani ka asar paya

yahan uTTha wahan chamka idhar aaya udhar paya

pata us ne diya tera mila jo 'ishq mein KHud gum

KHabar teri usi se pai jis ko be-KHabar paya

dil-e-betab ke pahlu se jate hi gaya sab kuchh

na pain sine mein aahen na aahon mein asar paya

wo chashm-e-muntazir thi jis ko dekha aa ke wa tum ne

wo nala tha hamara jis ko sote raat bhar paya

main hun wo na-tawan pinhan raha KHud aankh se apni

hamesha aap ko gum surat-e-tar-e-nazar paya

habib apna agar dekha to dagh-e-'ishq ko dekha

tabib apna agar paya to ek dard-e-jigar paya

kiya gum hum ne dil ko justuju mein dagh-e-hasrat ki

kisi ko pa ke kho baiThe kisi ko DhunDh kar paya

bahut se ashk-e-rangin ai 'jalal' is aankh se Tapke

magar be-rang hi dekha na kuchh rang-e-asar paya