tasawwur teri surat ka mujhe har shab satata hai

tasavvur terī sūrat kā mujhe har shab satātā hai

kabhū paas aa.e hai mere kabhū phir bhaag jaatā hai

ḳhudā jaane tujhe us kī ḳhabar hai yā nahīñ zālim

ki vo ik aan meñ kyā kyā samayñ mujh ko dikhātā hai

balā.eñ us kī maiñ letā huuñ chaT chaT uTh ke jis saa.at

mirī chālākiyoñ ko dekhe hai aur muskurātā hai

jo uThtā huuñ to kahtā hai ''kidhar jaatā hai īdhar aa''

jo baiThūñ huuñ to kahtā hai ki ''maiñ jaatā huuñ aatā hai''

jo rotā huuñ to kahtā hai tū kyuuñ rotā hai dīvāne

jo sar zaanū pe rakhtā huuñ to hāthoñ se uThātā hai

jo jāgūñ huuñ to kahtā hai kahīñ ab so bhī rah nādāñ

jo sotā huuñ to chuTkī le ke ik dil meñ jagātā hai

kabhī ho jaa.e hai ġhā.eb nazar se baat ke kahte

kabhī phir sāmne ho kar khaḌā bāteñ banātā hai

kabhī dikhlā.e hai pinDe kā lutf aur gaat kā aalam

kabhī nazdīk aa bāloñ kī apne bū suñghātā hai

ġharaz ai 'mus.hafī' maiñ kyā kahūñ shab-tā-sahar yū haiñ

na us ko chain aatā hai na mujh ko chain aatā hai

tasawwur teri surat ka mujhe har shab satata hai

kabhu pas aae hai mere kabhu phir bhag jata hai

KHuda jaane tujhe us ki KHabar hai ya nahin zalim

ki wo ek aan mein kya kya samayn mujh ko dikhata hai

balaen us ki main leta hun chaT chaT uTh ke jis saat

meri chaalakiyon ko dekhe hai aur muskuraata hai

jo uThta hun to kahta hai kidhar jata hai idhar aa

jo baiThun hun to kahta hai ki main jata hun aata hai

jo rota hun to kahta hai tu kyun rota hai diwane

jo sar zanu pe rakhta hun to hathon se uThata hai

jo jagun hun to kahta hai kahin ab so bhi rah nadan

jo sota hun to chuTki le ke ek dil mein jagata hai

kabhi ho jae hai ghaeb nazar se baat ke kahte

kabhi phir samne ho kar khaDa baaten banata hai

kabhi dikhlae hai pinDe ka lutf aur gat ka aalam

kabhi nazdik aa baalon ki apne bu sunghata hai

gharaz ai 'mushafi' main kya kahun shab-ta-sahar yu hain

na us ko chain aata hai na mujh ko chain aata hai