hum aap hi ko apna maqsud jaante hain

ham aap hī ko apnā maqsūd jānte haiñ

apne sivā.e kis ko maujūd jānte haiñ

ijz-o-niyāz apnā apnī taraf hai saarā

is musht-e-ḳhāk ko ham masjūd jānte haiñ

sūrat-pazīr ham bin hargiz nahīñ ve maane

ahl-e-nazar hamīñ ko ma.abūd jānte haiñ

ishq un kī aql ko hai jo mā-sivā hamāre

nāchīz jānte haiñ nā-būd jānte haiñ

apnī hī sair karne ham jalva-gar hue the

is ramz ko va-lekin mādūd jānte haiñ

yārab kase hai naaqa har ġhuncha is chaman kā

rāh-e-vafā ko ham to masdūd jānte haiñ

ye zulm-e-be-nihāyat dushvār-tar ki ḳhūbāñ

bad-vaz.iyoñ ko apnī mahmūd jānte haiñ

kyā jaane daab sohbat az ḳhvesh raftagāñ kā

majlis meñ shaiḳh-sāhib kuchh kuud jānte haiñ

mar kar bhī haath aave to 'mīr' muft hai vo

jī ke ziyān ko bhī ham suud jānte haiñ

hum aap hi ko apna maqsud jaante hain

apne siwae kis ko maujud jaante hain

ijz-o-niyaz apna apni taraf hai sara

is musht-e-KHak ko hum masjud jaante hain

surat-pazir hum bin hargiz nahin we mane

ahl-e-nazar hamin ko mabud jaante hain

ishq un ki aql ko hai jo ma-siwa hamare

nachiz jaante hain na-bud jaante hain

apni hi sair karne hum jalwa-gar hue the

is ramz ko wa-lekin madud jaante hain

yarab kase hai naqa har ghuncha is chaman ka

rah-e-wafa ko hum to masdud jaante hain

ye zulm-e-be-nihayat dushwar-tar ki KHuban

bad-waziyon ko apni mahmud jaante hain

kya jaane dab sohbat az KHwesh raftagan ka

majlis mein shaiKH-sahib kuchh kud jaante hain

mar kar bhi hath aawe to 'mir' muft hai wo

ji ke ziyan ko bhi hum sud jaante hain