kaun-o-makan mein yaro aabaad hain to hum hain

kaun-o-makāñ meñ yaaro ābād haiñ to ham haiñ

is arz aur samā kī buniyād haiñ to ham haiñ

vahdat se tā-ba-kasrat sab se zuhūr apnā

gar ek haiñ to ham haiñ haftād haiñ to ham haiñ

sab marz-būm-e-ālam hai jalva-gāh apnī

vīrān haiñ to ham haiñ ābād haiñ to ham haiñ

aqlīm-e-ḳhair-o-shar meñ hai hukm apnā jaarī

gar daad haiñ to ham haiñ be-dād haiñ to ham haiñ

is gulshan-e-jahāñ meñ sab hai bahār apnī

gar qumrī haiñ to ham haiñ shamshād haiñ to ham haiñ

haiñ jauhar apne yaaro har rañg meñ numāyāñ

gar teġh haiñ to ham haiñ jallād haiñ to ham haiñ

hai dast-gāh apnī sab shai meñ kār-farmā

gar fasd haiñ to ham haiñ fassād haiñ to ham haiñ

ye dārgīr-e-ālam sab apnī hālateñ haiñ

gar daam haiñ to ham haiñ sayyād haiñ to ham haiñ

ye raaz ham ne 'āsim' 'ḳhādim'-safī' se paayā

gar rushd haiñ to ham haiñ irshād haiñ to ham haiñ

kaun-o-makan mein yaro aabaad hain to hum hain

is arz aur sama ki buniyaad hain to hum hain

wahdat se ta-ba-kasrat sab se zuhur apna

gar ek hain to hum hain haftad hain to hum hain

sab marz-bum-e-alam hai jalwa-gah apni

viran hain to hum hain aabaad hain to hum hain

aqlim-e-KHair-o-shar mein hai hukm apna jari

gar dad hain to hum hain be-dad hain to hum hain

is gulshan-e-jahan mein sab hai bahaar apni

gar qumri hain to hum hain shamshad hain to hum hain

hain jauhar apne yaro har rang mein numayan

gar tegh hain to hum hain jallad hain to hum hain

hai dast-gah apni sab shai mein kar-farma

gar fasd hain to hum hain fassad hain to hum hain

ye dargir-e-alam sab apni haalaten hain

gar dam hain to hum hain sayyaad hain to hum hain

ye raaz hum ne 'asim' 'KHadim'-safi' se paya

gar rushd hain to hum hain irshad hain to hum hain