kyun aa gae hain bazm-e-zuhur-o-numud mein

kyuuñ aa ga.e haiñ bazm-e-zuhūr-o-numūd meñ

āzād mard ho ke rahe ham quyūd meñ

sālik hai kyuuñ taḳhayyul-e-tark-e-vajūd meñ

naqsh-e-suvar kā rañg hai tere shuhūd meñ

jo aa ga.e tajallī-e-tanzīh-e-zāt meñ

mahdūd kis tarīq se hoñge hudūd meñ

rāz-e-darūn-e-parda ze-rindān-e-mast purs

sālik hai kyuuñ hijāb-e-shuhūd-o-vajūd meñ

arinī o lan-tarānī kā sab raaz khul gayā

kyā nashsha-e-ġharīb hai sharb-ul-yahūd meñ

ai gul jahāñ meñ jin ko tirā ishq ho gayā

vo ḳhaar se khaTakte haiñ chashm-e-husūd meñ

mash.hūr-e-ḳhalq jo hai vo maqbūl-e-haq nahīñ

kyuuñ ahmaqoñ ko naaz huā hai numūd meñ

taa.at nahīñ hai vo ki jo ho be-huzūr-e-qalb

ai shaiḳh kyā dharā hai rukū-o-sujūd meñ

hai bul-ajab ye zamzama-e-saut-e-sarmadī

kis tarah aa.e ma.ariz-e-guft-o-shunūd meñ

suufī ye sahv mahv hue sadd-e-bāb-e-uns

kyā imbisāt kār-gah-e-hast-o-būd meñ

tār-e-nafas se hai tan-e-ḳhākī basā huā

hai ankabūt lipTī huī tār-o-pūd meñ

suufī yahī hai nūr-e-savād-e-hijāb-e-qalb

zulmat huī jo sīna-e-sozāñ ke duud meñ

faiz-e-nigāh-e-rahbar-e-kāmil kā hai asar

'sāqī' hai mahv tā.at-e-rabb-e-vadūd meñ

kyun aa gae hain bazm-e-zuhur-o-numud mein

aazad mard ho ke rahe hum quyud mein

salik hai kyun taKHayyul-e-tark-e-wajud mein

naqsh-e-suwar ka rang hai tere shuhud mein

jo aa gae tajalli-e-tanzih-e-zat mein

mahdud kis tariq se honge hudud mein

raaz-e-darun-e-parda ze-rindan-e-mast purs

salik hai kyun hijab-e-shuhud-o-wajud mein

arini o lan-tarani ka sab raaz khul gaya

kya nashsha-e-gharib hai sharb-ul-yahud mein

ai gul jahan mein jin ko tera ishq ho gaya

wo KHar se khaTakte hain chashm-e-husud mein

mashhur-e-KHalq jo hai wo maqbul-e-haq nahin

kyun ahmaqon ko naz hua hai numud mein

taat nahin hai wo ki jo ho be-huzur-e-qalb

ai shaiKH kya dhara hai ruku-o-sujud mein

hai bul-ajab ye zamzama-e-saut-e-sarmadi

kis tarah aae mariz-e-guft-o-shunud mein

sufi ye sahw mahw hue sadd-e-bab-e-uns

kya imbisat kar-gah-e-hast-o-bud mein

tar-e-nafas se hai tan-e-KHaki basa hua

hai ankabut lipTi hui tar-o-pud mein

sufi yahi hai nur-e-sawad-e-hijab-e-qalb

zulmat hui jo sina-e-sozan ke dud mein

faiz-e-nigah-e-rahbar-e-kaamil ka hai asar

'saqi' hai mahw taat-e-rabb-e-wadud mein