samad ko sarapa sanam dekhte hain

samad ko sarāpā sanam dekhte haiñ

musammā ko asmā meñ ham dekhte haiñ

tujhe kaif-e-mastī meñ ham dekhte haiñ

salāsa nazar kā adam dekhte haiñ

tirā husn-e-ausāf ham dekhte haiñ

fanā meñ baqā dam-ba-dam dekhte haiñ

jo haiñ ḳhālī-o-pur se sar-mast-e-naġhma

ham-āhañgī-e-kaif-o-kam dekhte haiñ

nazar-gāh terī hai ā.īna-dil

tujhe hairatī ho ke ham dekhte haiñ

fanā hai fanā muqtazā-e-mohabbat

taqāzā-e-ulfat ko ham dekhte haiñ

ġhubār-e-dil-o-dīda jo paak kar de

ham us ashk-e-shabnam ko yam dekhte haiñ

uThā jab se pindār-e-hastī kā parda

tujhe nūr-e-vahdat meñ ham dekhte haiñ

makīn-e-makāñ lā-makānī hai 'sāhir'

ham andāz-e-dair-o-haram dekhte haiñ

samad ko sarapa sanam dekhte hain

musamma ko asma mein hum dekhte hain

tujhe kaif-e-masti mein hum dekhte hain

salasa nazar ka adam dekhte hain

tera husn-e-ausaf hum dekhte hain

fana mein baqa dam-ba-dam dekhte hain

jo hain KHali-o-pur se sar-mast-e-naghma

ham-ahangi-e-kaif-o-kam dekhte hain

nazar-gah teri hai aaina-dil

tujhe hairati ho ke hum dekhte hain

fana hai fana muqtaza-e-mohabbat

taqaza-e-ulfat ko hum dekhte hain

ghubar-e-dil-o-dida jo pak kar de

hum us ashk-e-shabnam ko yam dekhte hain

uTha jab se pindar-e-hasti ka parda

tujhe nur-e-wahdat mein hum dekhte hain

makin-e-makan la-makani hai 'sahir'

hum andaz-e-dair-o-haram dekhte hain