teri inayaton ka ajab rang Dhang tha

terī ināyatoñ kā ajab rañg Dhañg thā

tere huzūr pā-e-qanā.at meñ lañg thā

sahrā ko rauñdne kī havas pā-ba-gil hai ab

yuuñ thā kabhī ki dāman-e-āfāq tañg thā

dāman ko tere thaam ke rāhat baḌī milī

ab tak maiñ apne aap se masrūf-e-jañg thā

hañgām-e-yād dil meñ na aahaT na dastakeñ

shorish-kade meñ raat ḳhamoshī kā rañg thā

tū aayā lauT aayā hai guzre dinoñ kā nuur

chehroñ pe apne varna to barsoñ kā zañg thā

raqs-e-junūñ meñ bhī thā tarīq-e-hunar kā Dhab

sūfi-e-bā-safā thā koī yā malañg thā

kyā āsmāñ uThāte mohabbat meñ jab ki dil

tār-e-nigah meñ uljhī huī ik patañg thā

teri inayaton ka ajab rang Dhang tha

tere huzur pa-e-qanaat mein lang tha

sahra ko raundne ki hawas pa-ba-gil hai ab

yun tha kabhi ki daman-e-afaq tang tha

daman ko tere tham ke rahat baDi mili

ab tak main apne aap se masruf-e-jang tha

hangam-e-yaad dil mein na aahaT na dastaken

shorish-kade mein raat KHamoshi ka rang tha

tu aaya lauT aaya hai guzre dinon ka nur

chehron pe apne warna to barson ka zang tha

raqs-e-junun mein bhi tha tariq-e-hunar ka Dhab

sufi-e-ba-safa tha koi ya malang tha

kya aasman uThate mohabbat mein jab ki dil

tar-e-nigah mein uljhi hui ek patang tha