tujhi ko jo yan jalwa-farma na dekha

tujhī ko jo yaañ jalva-farmā na dekhā

barābar hai duniyā ko dekhā na dekhā

mirā ġhuncha-e-dil hai vo dil girafta

ki jis ko kisū ne kabhū vā na dekhā

yagāna hai tū aah begānagī meñ

koī dūsrā aur aisā na dekhā

aziyyat musībat malāmat balā.eñ

tire ishq meñ ham ne kyā kyā na dekhā

kiyā muj ko dāġhoñ ne sarv-e-charāġhāñ

kabhū tū ne aa kar tamāshā na dekhā

taġhāful ne tere ye kuchh din dikhā.e

idhar tū ne lekin na dekhā na dekhā

hijāb-e-ruḳh-e-yār the aap hī ham

khulī aañkh jab koī pardā na dekhā

shab o roz ai 'dard' dar pe huuñ us ke

kisū ne jise yaañ na samjhā na dekhā

tujhi ko jo yan jalwa-farma na dekha

barabar hai duniya ko dekha na dekha

mera ghuncha-e-dil hai wo dil girafta

ki jis ko kisu ne kabhu wa na dekha

yagana hai tu aah beganagi mein

koi dusra aur aisa na dekha

aziyyat musibat malamat balaen

tere ishq mein hum ne kya kya na dekha

kiya muj ko daghon ne sarw-e-charaghan

kabhu tu ne aa kar tamasha na dekha

taghaful ne tere ye kuchh din dikhae

idhar tu ne lekin na dekha na dekha

hijab-e-ruKH-e-yar the aap hi hum

khuli aankh jab koi parda na dekha

shab o roz ai 'dard' dar pe hun us ke

kisu ne jise yan na samjha na dekha