ye ek shan-e-KHuda hai main nahin hun

ye ik shān-e-ḳhudā hai maiñ nahīñ huuñ

vahī jalva-numā hai maiñ nahīñ huuñ

zamāna pahle mujh ko DhūñDtā hai

magar terā patā hai maiñ nahīñ huuñ

tire hote mirī hastī kā kyā zikr

yahī kahnā bajā hai maiñ nahīñ huuñ

sadā-e-nahno-aqrab kah rahī hai

ki tū mujh se judā hai maiñ nahīñ huuñ

vo ḳhud tashrīf-farmā-e-jahāñ haiñ

tumheñ dhokā huā hai maiñ nahīñ huuñ

kahāñ maiñ aur kahāñ ḳhabt-e-anal-haq

koī mere sivā hai maiñ nahīñ huuñ

mujhe 'āzād' duniyā kyuuñ na puuje

kisī kā naqsh-e-pā hai maiñ nahīñ huuñ

ye ek shan-e-KHuda hai main nahin hun

wahi jalwa-numa hai main nahin hun

zamana pahle mujh ko DhunDta hai

magar tera pata hai main nahin hun

tere hote meri hasti ka kya zikr

yahi kahna baja hai main nahin hun

sada-e-nahno-aqrab kah rahi hai

ki tu mujh se juda hai main nahin hun

wo KHud tashrif-farma-e-jahan hain

tumhein dhoka hua hai main nahin hun

kahan main aur kahan KHabt-e-anal-haq

koi mere siwa hai main nahin hun

mujhe 'azad' duniya kyun na puje

kisi ka naqsh-e-pa hai main nahin hun