nazar se guftugu KHamosh lab tumhaari tarah

nazar se guftugū ḳhāmosh lab tumhārī tarah

ġhazal ne sīkhe haiñ andāz sab tumhārī tarah

jo pyaas tez ho to ret bhī hai chādar-e-āb

dikhā.ī duur se dete haiñ sab tumhārī tarah

bulā rahā hai zamāna magar tarastā huuñ

koī pukāre mujhe be-sabab tumhārī tarah

havā kī tarah maiñ be-tāb huuñ ki shāḳh-e-gulāb

lahaktī hai mirī aahaT pe ab tumhārī tarah

misāl-e-vaqt meñ tasvīr-e-sub.h-o-shām huuñ ab

mire vajūd pe chhā.ī hai shab tumhārī tarah

sunāte haiñ mujhe ḳhvāboñ kī dāstāñ aksar

kahāniyoñ ke pur-asrār lab tumhārī tarah

nazar se guftugu KHamosh lab tumhaari tarah

ghazal ne sikhe hain andaz sab tumhaari tarah

jo pyas tez ho to ret bhi hai chadar-e-ab

dikhai dur se dete hain sab tumhaari tarah

bula raha hai zamana magar tarasta hun

koi pukare mujhe be-sabab tumhaari tarah

hawa ki tarah main be-tab hun ki shaKH-e-gulab

lahakti hai meri aahaT pe ab tumhaari tarah

misal-e-waqt mein taswir-e-subh-o-sham hun ab

mere wajud pe chhai hai shab tumhaari tarah

sunate hain mujhe KHwabon ki dastan aksar

kahaniyon ke pur-asrar lab tumhaari tarah