taskin-e-dil ka ye kya qarina

taskīn-e-dil kā ye kyā qarīna

rokūñ jo naala phaT jaa.e siina

baḌhtī umañgeñ kyā par baneñgī

hai kis havā meñ dil kā safīna

haiñ kyā muamma ye aag paanī

piitā huuñ aañsū jaltā hai siina

ġham tujh ko pyārā tū mujh ko pyārī

dil kī tamannā nāzuk hasīna

aaj us ne aañsū hañs hañs ke poñchhe

ḳhushkī meñ ubhrā Duubā safīna

tārīḳh dil kī ḳhud naqsh-e-dil hai

khā khā ke choTeñ chaTkā nagīna

TuuTā huā dil ulfat bharā thā

Dhā kar imārat paayā dafīna

hadd-e-ḳhirad se zaat us kī bartar

ūñchī hai manzil nīchā hai ziina

tum 'ārzū' ho tum 'ārzū' ho

phir kaisī ranjish phir kaisā kiina

taskin-e-dil ka ye kya qarina

rokun jo nala phaT jae sina

baDhti umangen kya par banengi

hai kis hawa mein dil ka safina

hain kya muamma ye aag pani

pita hun aansu jalta hai sina

gham tujh ko pyara tu mujh ko pyari

dil ki tamanna nazuk hasina

aaj us ne aansu hans hans ke ponchhe

KHushki mein ubhra Duba safina

tariKH dil ki KHud naqsh-e-dil hai

kha kha ke choTen chaTka nagina

TuTa hua dil ulfat bhara tha

Dha kar imarat paya dafina

hadd-e-KHirad se zat us ki bartar

unchi hai manzil nicha hai zina

tum 'arzu' ho tum 'arzu' ho

phir kaisi ranjish phir kaisa kina