taskin-e-iztirab-e-tamanna na kijiye

taskīn-e-iztirāb-e-tamannā na kījiye

mujh se judā abhī mirī duniyā na kījiye

dīvāna-e-fareb-e-tamannā na kījiye

merī taraf se mujh ko pukārā na kījiye

kuchh duur chalne dījiye ab ḳhud hī ishq ko

har har qadam pe aap ishārā na kījiye

dil ke sivā tamām kitāb-e-hayāt meñ

ik lafz bhī nahīñ jise afsāna kījiye

uThte haiñ jab junūñ meñ garebāñ kī samt haath

kahtā hai koī jaise ki rusvā na kījiye

dil to taḌap uThegā jo mujh ko ḳhabar na ho

chhup kar mere qarīb se guzrā na kījiye

'shādāñ' thame hamāre to aañsū na aaj tak

jab se vo kah ga.e haiñ ki royā na kījiye

taskin-e-iztirab-e-tamanna na kijiye

mujh se juda abhi meri duniya na kijiye

diwana-e-fareb-e-tamanna na kijiye

meri taraf se mujh ko pukara na kijiye

kuchh dur chalne dijiye ab KHud hi ishq ko

har har qadam pe aap ishaara na kijiye

dil ke siwa tamam kitab-e-hayat mein

ek lafz bhi nahin jise afsana kijiye

uThte hain jab junun mein gareban ki samt hath

kahta hai koi jaise ki ruswa na kijiye

dil to taDap uThega jo mujh ko KHabar na ho

chhup kar mere qarib se guzra na kijiye

'shadan' thame hamare to aansu na aaj tak

jab se wo kah gae hain ki roya na kijiye