taswir-e-zulf-o-ariz-e-gulfam le gaya

tasvīr-e-zulf-o-āriz-e-gulfām le gayā

murġhān-e-quds ke liye gul-dām le gayā

duniyā se dāġh-e-zulf-e-siyah-fām le gayā

maiñ gor meñ charāġh sar-e-shām le gayā

kī tark maiñ ne shaiḳh-o-barahman kī pairvī

dair-o-haram meñ mujh ko tirā naam le gayā

kyā kyā dikhā.ī sair-e-safed-o-siyāh-e-dahr

kis kis taraf ko ablaq-e-ayyām le gayā

e.ajāz maiñ ne raj.at-e-ḳhurshīd kā kiyā

bālā-e-bām us ko sar-e-shām le gayā

bhaTke phire do amla-e-dair-o-haram meñ ham

is samt kufr us taraf islām le gayā

chehle ke gul chaḌhā.e koī merī qabr par

maiñ ārzū-e-vasl-e-gul-andām le gayā

pistān-e-nau-damīda ne malvā.e ḳhuub haath

maiñ dāġh-e-hasrat-e-samar-e-ḳhām le gayā

dīdār dostān-e-vatan kā dikhā diyā

mujh ko adam meñ ablaq-e-ayyam le gayā

pahnā kafan to kūcha-e-qātil maiñ paa.ī raah

ka.abe meñ mujh ko jāma-e-ehrām le gayā

rāh-e-adam meñ sair-e-charāġhāñ nazar paḌī

turbat meñ dāġh-e-ġham dil-e-nākām le gayā

dozaḳh meñ jal gayā kabhī jannat meñ ḳhush rahā

mar kar bhī saath gardish-e-ayyām le gayā

nafrat huī do-rañgī-e-lail-o-nahār se

maiñ sub.h-o-shām us ko lab-e-bām le gayā

zer-e-zamīñ ġhurūb huā āftāb aaj

turbat meñ daaġh bāda-e-gulfām le gayā

tīr-e-sitam se mil ke uḌā jānib-e-adam

par aap ke ḳhadañg se maiñ daam le gayā

maiñ justujū-e-kufr meñ pahuñchā ḳhudā ke paas

ka.abe tak un butoñ kā mujhe naam le gayā

saaqī ke paas vus.at-e-mashrab ne raah dī

maiñ kāsa-e-falak evaz-e-jām le gayā

kuchh lutf ishq kā na milā jīte-jī 'munīr'

nāhaq kā rañj muft kā ilzām le gayā

taswir-e-zulf-o-ariz-e-gulfam le gaya

murghan-e-quds ke liye gul-dam le gaya

duniya se dagh-e-zulf-e-siyah-fam le gaya

main gor mein charagh sar-e-sham le gaya

ki tark main ne shaiKH-o-barahman ki pairwi

dair-o-haram mein mujh ko tera nam le gaya

kya kya dikhai sair-e-safed-o-siyah-e-dahr

kis kis taraf ko ablaq-e-ayyam le gaya

eajaz main ne rajat-e-KHurshid ka kiya

baala-e-baam us ko sar-e-sham le gaya

bhaTke phire do amla-e-dair-o-haram mein hum

is samt kufr us taraf islam le gaya

chehle ke gul chaDhae koi meri qabr par

main aarzu-e-wasl-e-gul-andam le gaya

pistan-e-nau-damida ne malwae KHub hath

main dagh-e-hasrat-e-samar-e-KHam le gaya

didar dostan-e-watan ka dikha diya

mujh ko adam mein ablaq-e-ayyam le gaya

pahna kafan to kucha-e-qatil main pai rah

kabe mein mujh ko jama-e-ehram le gaya

rah-e-adam mein sair-e-charaghan nazar paDi

turbat mein dagh-e-gham dil-e-nakaam le gaya

dozaKH mein jal gaya kabhi jannat mein KHush raha

mar kar bhi sath gardish-e-ayyam le gaya

nafrat hui do-rangi-e-lail-o-nahaar se

main subh-o-sham us ko lab-e-baam le gaya

zer-e-zamin ghurub hua aaftab aaj

turbat mein dagh baada-e-gulfam le gaya

tir-e-sitam se mil ke uDa jaanib-e-adam

par aap ke KHadang se main dam le gaya

main justuju-e-kufr mein pahuncha KHuda ke pas

kabe tak un buton ka mujhe nam le gaya

saqi ke pas wusat-e-mashrab ne rah di

main kasa-e-falak ewaz-e-jam le gaya

kuchh lutf ishq ka na mila jite-ji 'munir'

nahaq ka ranj muft ka ilzam le gaya