تصویر سے کبھی تو کبھی خود سے بات کی

تصویر سے کبھی تو کبھی خود سے بات کی

تجھ سے بچھڑ کے میں نے یوں ہی دن سے رات کی

اب تک تمام درد و الم مل چکے مجھے

اب مجھ پہ انتہا ہے ترے التفات کی

جب مسکرائے گا تو جہاں مسکرائے گا

تقدیر بن چکا ہے کوئی کائنات کی

یہ اور بات میں ہی انہیں دیکھتا رہا

وہ سامنے بھی آئے تو کب مجھ سے بات کی

بس جان لو وہیں سے رہ‌ دوست آ گئی

جب ابتدا ہو سلسلۂ حادثات کی

غم سے نجات مجھ کو ملے کس طرح ظہورؔ

کچھ فکر بھی تو چاہئے راہ نجات کی