tauba ka takalluf kaun kare haalat ki niyyat Thik nahin

tauba kā takalluf kaun kare hālāt kī niyyat Thiik nahīñ

rahmat kā irāda bigḌā hai barsāt kī niyyat Thiik nahīñ

ai sham.a bachānā dāman ko ismat se mohabbat arzāñ hai

ālūda-nazar parvānoñ ke jazbāt kī niyyat Thiik nahīñ

kal qat.a ta.alluq kar lenā is vaqt to duniyā merī hai

ye raat kī qasmeñ jhūTī haiñ ye raat kī niyyat Thiik nahīñ

aisā nazar aatā hai jaise ye shai mujhe pāgal kar degī

thoḌī sī tavajjoh bar-haq hai bohtāt kī niyyat Thiik nahīñ

raftār-e-zamāna kā lahja saffāk dikhā.ī detā hai

bar-vaqt koī tadbīr karo āfāt kī niyyat Thiik nahīñ

mai-ḳhāne kī rasm-o-rāh meñ bhī ho jaa.e na shāmil khoT kaheñ

ḳhuddām fareb-āmāda haiñ ḳhidmāt kī niyyat Thiik nahīñ

thoḌā sā kaḌā gar dil ko karūñ ādāt badal to saktī haiñ

par asl musībat to ye hai ādāt kī niyyat Thiik nahīñ

Dartā huuñ 'adam' phir aaj kahīñ sho.ala na uThe bijlī na gire

barbat kī tabī.at uljhī hai naġhmāt kī niyyat Thiik nahīñ

tauba ka takalluf kaun kare haalat ki niyyat Thik nahin

rahmat ka irada bigDa hai barsat ki niyyat Thik nahin

ai shama bachana daman ko ismat se mohabbat arzan hai

aaluda-nazar parwanon ke jazbaat ki niyyat Thik nahin

kal qata talluq kar lena is waqt to duniya meri hai

ye raat ki qasmen jhuTi hain ye raat ki niyyat Thik nahin

aisa nazar aata hai jaise ye shai mujhe pagal kar degi

thoDi si tawajjoh bar-haq hai bohtat ki niyyat Thik nahin

raftar-e-zamana ka lahja saffak dikhai deta hai

bar-waqt koi tadbir karo aafat ki niyyat Thik nahin

mai-KHane ki rasm-o-rah mein bhi ho jae na shamil khoT kahen

KHuddam fareb-amada hain KHidmat ki niyyat Thik nahin

thoDa sa kaDa gar dil ko karun aadat badal to sakti hain

par asl musibat to ye hai aadat ki niyyat Thik nahin

Darta hun 'adam' phir aaj kahin shoala na uThe bijli na gire

barbat ki tabiat uljhi hai naghmat ki niyyat Thik nahin