taufiq se kab koi sarokar chale hai

taufīq se kab koī sarokār chale hai

duniyā meñ faqat tāla-e-bedār chale hai

Thahrūñ to chaTānoñ sī kaleje pe khaḌī hai

jā.ūñ to mire saath hī dīvār chale hai

har ġhuncha baḌe chaav se khiltā hai chaman meñ

har daur kā mansūr sar-e-dār chale hai

rañgoñ kī na ḳhushbū kī kamī hai dil-o-jāñ ko

tosha jo chale saath vo ik ḳhaar chale hai

dil ke liye bas aañkh kā me.aar bahut hai

jo sikka-e-jāñ hai sar-e-bāzār chale hai

hairat se shagūfoñ kī jhapaktī nahīñ āñkheñ

kis aan se kāñToñ kā ḳharīdār chale hai

ḳhurshīd vahāñ ham ne sulagte hue dekhe

kirnoñ kā jis āshob meñ bevpār chale hai

ik jumbish-e-mizhgāñ kī ijāzat bhī nahīñ hai

dil saath chalā hai ki sitamgār chale hai

the ḳhizr bhī lākhoñ yahāñ iisā bhī bahut the

āzār jo dil kā hai so āzār chale hai

taufiq se kab koi sarokar chale hai

duniya mein faqat tala-e-bedar chale hai

Thahrun to chaTanon si kaleje pe khaDi hai

jaun to mere sath hi diwar chale hai

har ghuncha baDe chaw se khilta hai chaman mein

har daur ka mansur sar-e-dar chale hai

rangon ki na KHushbu ki kami hai dil-o-jaan ko

tosha jo chale sath wo ek KHar chale hai

dil ke liye bas aankh ka mear bahut hai

jo sikka-e-jaan hai sar-e-bazar chale hai

hairat se shagufon ki jhapakti nahin aankhen

kis aan se kanTon ka KHaridar chale hai

KHurshid wahan hum ne sulagte hue dekhe

kirnon ka jis aashob mein bewpar chale hai

ek jumbish-e-mizhgan ki ijazat bhi nahin hai

dil sath chala hai ki sitamgar chale hai

the KHizr bhi lakhon yahan isa bhi bahut the

aazar jo dil ka hai so aazar chale hai