tazkire fahm o KHirad ke to yahan hote hain

tazkire fahm o ḳhirad ke to yahāñ hote haiñ

'aql kī had se magar aage gumāñ hote haiñ

chhoḌ jaate haiñ kahīñ paas tire apnā vajūd

ghar pahuñch kar bhī to ham ghar meñ kahāñ hote haiñ

ḳhvāb o ummīd, gumāñ, us kā tasavvur, chāhat

talḳhī-e-zīst meñ ye rāhat-e-jāñ hote haiñ

kis tarah arz-guzārī se unheñ rokā hai

aise jazbe ki jo chhupte na 'ayāñ hote haiñ

'ishq meñ tarz-e-takallum kī rivāyat hai 'ajab

kalma-e-ḳhās nigāhoñ se bayāñ hote haiñ

ḳhvāb jab jab hue zaḳhmī to hue sher na.e

varna ye mo.ajize har roz kahāñ hote haiñ

sirf pindār-e-ḳhirad hī to nahīñ shaġhl-e-hayāt

mātam-e-ilm-o-amal bhī to yahāñ hote haiñ

saḳhtī-e-hashr se hoñge na kisī taur bhī kam

un ke ham-rāh vo lamhe jo girāñ hote haiñ

ātish-e-dil hai yā phir sozish-e-jāñ hai, kyā hai?

ek ik kar ke sabhī ḳhvāb dhuāñ hote haiñ

nasl-e-nau ke haiñ na.e shuġhl, na.ī hī tahzīb

bazm-e-imroz meñ azkār-e-butāñ hote haiñ

aksar auqāt tabāhī kā sabab huuñ, lekin

kuchh havādis bhī magar vaj.h-e-amāñ hote haiñ

'umr bhar khul nahīñ paate haiñ rumūz-o-asrār

log kuchh sāmne rah kar bhī nihāñ hote haiñ

bārhā TuuT ke bhii, haiñ kahīñ maujūd abhī

valvale vo jo tire saath javāñ hote haiñ

ham ko to mil na sake, tum ko mile hoñge kahīñ

vo jo har haal meñ pāband-e-zabāñ hote haiñ

kyā kahā us ne, ye kyā kah ke pukārā 'ḳhālid'

aise kuchh jumle adā vaqt-e-azāñ hote haiñ

tazkire fahm o KHirad ke to yahan hote hain

'aql ki had se magar aage guman hote hain

chhoD jate hain kahin pas tere apna wajud

ghar pahunch kar bhi to hum ghar mein kahan hote hain

KHwab o ummid, guman, us ka tasawwur, chahat

talKHi-e-zist mein ye rahat-e-jaan hote hain

kis tarah arz-guzari se unhen roka hai

aise jazbe ki jo chhupte na 'ayan hote hain

'ishq mein tarz-e-takallum ki riwayat hai 'ajab

kalma-e-KHas nigahon se bayan hote hain

KHwab jab jab hue zaKHmi to hue sher nae

warna ye moajize har roz kahan hote hain

sirf pindar-e-KHirad hi to nahin shaghl-e-hayat

matam-e-ilm-o-amal bhi to yahan hote hain

saKHti-e-hashr se honge na kisi taur bhi kam

un ke ham-rah wo lamhe jo giran hote hain

aatish-e-dil hai ya phir sozish-e-jaan hai, kya hai?

ek ek kar ke sabhi KHwab dhuan hote hain

nasl-e-nau ke hain nae shughl, nai hi tahzib

bazm-e-imroz mein azkar-e-butan hote hain

aksar auqat tabahi ka sabab hun, lekin

kuchh hawadis bhi magar wajh-e-aman hote hain

'umr bhar khul nahin pate hain rumuz-o-asrar

log kuchh samne rah kar bhi nihan hote hain

barha TuT ke bhi, hain kahin maujud abhi

walwale wo jo tere sath jawan hote hain

hum ko to mil na sake, tum ko mile honge kahin

wo jo har haal mein paband-e-zaban hote hain

kya kaha us ne, ye kya kah ke pukara 'KHalid'

aise kuchh jumle ada waqt-e-azan hote hain