tegh-e-pur-KHun wo agar dhoe kanar-e-dariya

teġh-e-pur-ḳhūñ vo agar dho.e kanār-e-dariyā

ḳhanda-zan rañg-e-chaman par ho bahār-e-dariyā

atash-e-ishq kī lazzat ye milī hai ham ko

jā gireñ aag meñ aur hoñ na dochār-e-dariyā

durra-e-mauj lagātā hai use be-taqsīr

kyuuñ na ho lāsha mirā shikva-guzār-e-dariyā

surḳhī-e-aks-e-shafaq par jo paḌā lab kā gumāñ

la.al-o-yāqūt kiye ham ne nisār-e-dariyā

naḳhl-e-ḳhvāhish jo nahīñ hotā hai is se sarsabz

girya kartā hai mirā ḳhanda ba-kār-e-dariyā

machhliyāñ laḳht-e-jigar bantī haiñ dariyā aañsū

kis gul-e-tar ko huā shauq-e-shikār-e-dariyā

kyā gul-andām koī is meñ nahāyā thā jo aaj

rag-e-gul se haiñ mo.attar ḳhas-o-ḳhār-e-dariyā

kis kī zulf-e-araq-afshāñ kā tasavvur hai unheñ

lipTe hī jaate haiñ bahroñ se jo mār-e-dariyā

sail-e-āfāt meñ tan dete haiñ jo ai 'ġhāfil'

misl-e-ḳhāshāk vo rahte haiñ savār-e-dariyā

tegh-e-pur-KHun wo agar dhoe kanar-e-dariya

KHanda-zan rang-e-chaman par ho bahaar-e-dariya

atash-e-ishq ki lazzat ye mili hai hum ko

ja giren aag mein aur hon na dochaar-e-dariya

durra-e-mauj lagata hai use be-taqsir

kyun na ho lasha mera shikwa-guzar-e-dariya

surKHi-e-aks-e-shafaq par jo paDa lab ka guman

lal-o-yaqut kiye hum ne nisar-e-dariya

naKHl-e-KHwahish jo nahin hota hai is se sarsabz

girya karta hai mera KHanda ba-kar-e-dariya

machhliyan laKHt-e-jigar banti hain dariya aansu

kis gul-e-tar ko hua shauq-e-shikar-e-dariya

kya gul-andam koi is mein nahaya tha jo aaj

rag-e-gul se hain moattar KHas-o-KHar-e-dariya

kis ki zulf-e-araq-afshan ka tasawwur hai unhen

lipTe hi jate hain bahron se jo mar-e-dariya

sail-e-afat mein tan dete hain jo ai 'ghafil'

misl-e-KHashak wo rahte hain sawar-e-dariya