tegh-e-uryan pe tumhaari jo paDi meri aankh

teġh-e-uryāñ pe tumhārī jo paḌī merī aañkh

chashm-e-jauhar se ajī ḳhuub laḌī merī aañkh

na haTī peT par us ke jo paḌī merī aañkh

ban ga.ī nāf-e-shikam aise aḌī merī aañkh

ashk-e-gul rañg pirotī hai mizha meñ kyā ḳhuub

kyā banātī hai ye phūloñ kī chhaḌī merī aañkh

tum rahe baam pe yaañ lag ga.iiñ āñkheñ chhat se

raat gintī rahī har ek kaḌī merī aañkh

is ḳhajālat ne abad tak mujhe sone na diyā

hijr meñ lag ga.ī thī ek ghaḌī merī aañkh

dur-e-dandāñ kī bhalā aa.ina kyā jaane qadr

is ko dikhlāo mubassir hai baḌī merī aañkh

ḳhat-e-ruḳhsār nahīñ pā-e-nigah ke haiñ nishāñ

āriz-e-sāf pe sau baar paḌī merī aañkh

yaad aa.e jo tire teġh kā maalā qātil

roke paidā kare motī kī laḌī merī aañkh

raḳhna dīvār meñ me.amār banānā kyā thā

tū ne rauzan ke evaz kyuuñ na jaḌī merī aañkh

zindagī meñ to kiyā mardum-e-ābī mujh ko

dekhūñ ab kyā ho mire saath gaḌī merī aañkh

zulf kī tarah se zanjīr huī jaatī hai narm

paḌtī hai josh-e-junūñ meñ ye kaḌī merī aañkh

kyā usī ne ye kiyā matla-e-abrū mauzūñ

tum jo kahte ho suḳhan-goī baḌī merī aañkh

chashm meñ surme kā dumbāla banā kar bole

kyuuñ asā Tek ke ho jaa.e khaḌī merī aañkh

naḳhl-e-nargis nahīñ turbat pe nazāre ke liye

aa.ine dekhtī hai raah khaḌī merī aañkh

nazar aa.egī zamīñ kashtī-e-dariyā-e-fanā

dekh lenā jo mire saath gaḌī merī aañkh

bāġhbāñ nahr nahīñ yaad meñ ik kūche kī

ro rahī hai ye gulistāñ meñ paḌī merī aañkh

karte hī ek nigah meñ lab-e-nāzuk ko kabūd

kyā banā detī hai missī kī dhaḌī merī aañkh

aa.e terā jo tasavvur bhī to bahr-e-tāzīm

kyā ajab pā-e-nigah se ho khaḌī merī aañkh

dil par-e-dāġh huā dafn to laala niklā

ugī nargis jo gulistāñ meñ gaḌī merī aañkh

yaad aate haiñ mujhe hazrat-e-'nāsiḳh' jo 'vazīr'

kyā lagā detī hai ashkoñ kī jhaḌī merī aañkh

tegh-e-uryan pe tumhaari jo paDi meri aankh

chashm-e-jauhar se aji KHub laDi meri aankh

na haTi peT par us ke jo paDi meri aankh

ban gai naf-e-shikam aise aDi meri aankh

ashk-e-gul rang piroti hai mizha mein kya KHub

kya banati hai ye phulon ki chhaDi meri aankh

tum rahe baam pe yan lag gain aankhen chhat se

raat ginti rahi har ek kaDi meri aankh

is KHajalat ne abad tak mujhe sone na diya

hijr mein lag gai thi ek ghaDi meri aankh

dur-e-dandan ki bhala aaina kya jaane qadr

is ko dikhlao mubassir hai baDi meri aankh

KHat-e-ruKHsar nahin pa-e-nigah ke hain nishan

aariz-e-saf pe sau bar paDi meri aankh

yaad aae jo tere tegh ka mala qatil

roke paida kare moti ki laDi meri aankh

raKHna diwar mein meamar banana kya tha

tu ne rauzan ke ewaz kyun na jaDi meri aankh

zindagi mein to kiya mardum-e-abi mujh ko

dekhun ab kya ho mere sath gaDi meri aankh

zulf ki tarah se zanjir hui jati hai narm

paDti hai josh-e-junun mein ye kaDi meri aankh

kya usi ne ye kiya matla-e-abru mauzun

tum jo kahte ho suKHan-goi baDi meri aankh

chashm mein surme ka dumbaala bana kar bole

kyun asa Tek ke ho jae khaDi meri aankh

naKHl-e-nargis nahin turbat pe nazare ke liye

aaine dekhti hai rah khaDi meri aankh

nazar aaegi zamin kashti-e-dariya-e-fana

dekh lena jo mere sath gaDi meri aankh

baghban nahr nahin yaad mein ek kuche ki

ro rahi hai ye gulistan mein paDi meri aankh

karte hi ek nigah mein lab-e-nazuk ko kabud

kya bana deti hai missi ki dhaDi meri aankh

aae tera jo tasawwur bhi to bahr-e-tazim

kya ajab pa-e-nigah se ho khaDi meri aankh

dil par-e-dagh hua dafn to lala nikla

ugi nargis jo gulistan mein gaDi meri aankh

yaad aate hain mujhe hazrat-e-'nasiKH' jo 'wazir'

kya laga deti hai ashkon ki jhaDi meri aankh