تیغ رکھتے ہیں نہ ہم تیر و تبر رکھتے ہیں

تیغ رکھتے ہیں نہ ہم تیر و تبر رکھتے ہیں

ہاں یزیدوں سے نہ جھک پائے وہ سر رکھتے ہیں

بے خبر لوگوں کو احساس نہیں ہے اس کا

جو خبر والے ہیں ہر شے کی خبر رکھتے ہیں

پھوٹی کوڑی کے نہیں ہیں یہ مگس جیسے لوگ

صرف انسان کے زخموں پہ نظر رکھتے ہیں

کوئی یاران شریعت سے یہ جا کر پوچھے

پہلے دل رکھتے ہیں سجدے میں کہ سر رکھتے ہیں

ہے کوئی ہم میں جو تھکتا نہیں چلتے چلتے

گھر میں رہ کر بھی ہم احساس سفر رکھتے ہیں

آندھیاں اس کو گلے آ کے لگا لیں شاید

اک دیا اور سر راہ گزر رکھتے ہیں

بوجھ سر پر لیے پھرنا نہیں آتا ہم کو

جو مسائل ہیں ہمارے انہیں گھر رکھتے ہیں

ایک پت جھڑ سا لگا رہتا ہے ہر دم دل میں

ہم جو سینے میں یہ احساس شجر رکھتے ہیں

نیند جب ہم کو ستاتی ہے بہت میداں میں

اپنی کھینچی ہوئی تلوار پہ سر رکھتے ہیں

آئے جو قتل کے درپے ہے مقابل آئے

ہم بھی سینے کو سدا اپنے سپر رکھتے ہیں

بد دعاؤں کا نہیں ہوگا اثر کچھ عابدؔ

ہم بزرگوں کی دعاؤں کا اثر رکھتے ہیں