tera andaz-e-suKHan sab se juda lagta hai

terā andāz-e-suḳhan sab se judā lagtā hai

barbat-e-dil pe koī naġhma-sarā lagtā hai

vo diyā jis se ki raushan ho charāġh-e-hastī

ġhaur se dekheñ havāoñ meñ ghirā lagtā hai

ham haiñ āġhosh-e-junūñ meñ to ta.ajjub kaisā

vo bhī to dushman-e-arbāb-e-vafā lagtā hai

gar nahīñ jalvagarī bazm-e-tarab meñ phir bhī

terī ḳhushbū se vahāñ terā patā lagtā hai

donoñ hāthoñ se chhupānā tire chehre kā mujhe

sochtā huuñ to tirā dast-e-duā lagtā hai

jis kā milnā bhī qayāmat se nahīñ kam 'jāved'

is kā milnā bhī mujhe roz-e-jazā lagtā hai

tera andaz-e-suKHan sab se juda lagta hai

barbat-e-dil pe koi naghma-sara lagta hai

wo diya jis se ki raushan ho charagh-e-hasti

ghaur se dekhen hawaon mein ghira lagta hai

hum hain aaghosh-e-junun mein to tajjub kaisa

wo bhi to dushman-e-arbab-e-wafa lagta hai

gar nahin jalwagari bazm-e-tarab mein phir bhi

teri KHushbu se wahan tera pata lagta hai

donon hathon se chhupana tere chehre ka mujhe

sochta hun to tera dast-e-dua lagta hai

jis ka milna bhi qayamat se nahin kam 'jawed'

is ka milna bhi mujhe roz-e-jaza lagta hai