tera apna hi qabila to hai taqat teri

terā apnā hī qabīla to hai tāqat terī

aur apne hī qabīle se baġhāvat terī

ek bas jurm-e-mohabbat hī huā hai ham se

ab sazā chāhe hameñ jo de adālat terī

Dhā ke armānoñ kā ghar kaun yahāñ pūchhtā hai

kitnī is ghar meñ batā aa.ī thī lāgat terī

pyaar kī dhuup kā mausam tirī āñkho se gayā

baḌh ga.ī ab mire ḳhurshīd tamāzat terī

lahlahāte haiñ mohabbat ke gulistāñ har sū

kitnī zarḳhez zamīñ hai mire bhārat terī

ḳhud hī bīmār kare ḳhud hī vo pūchhe 'vāsiq'

kaun sā rog hai kyoñ bigḌī hai hālat terī

tera apna hi qabila to hai taqat teri

aur apne hi qabile se baghawat teri

ek bas jurm-e-mohabbat hi hua hai hum se

ab saza chahe hamein jo de adalat teri

Dha ke armanon ka ghar kaun yahan puchhta hai

kitni is ghar mein bata aai thi lagat teri

pyar ki dhup ka mausam teri aankho se gaya

baDh gai ab mere KHurshid tamazat teri

lahlahate hain mohabbat ke gulistan har su

kitni zarKHez zamin hai mere bhaarat teri

KHud hi bimar kare KHud hi wo puchhe 'wasiq'

kaun sa rog hai kyon bigDi hai haalat teri